Манчини: «Францияни йирик ҳисобда енгишимиз ҳам мумкин эди»

Италия миллий жамоаси бош мураббийи Роберто Манчини Миллатлар лигаси доирасидаги Францияга (3:1) қарши баҳсдан сўнг ўз фикрлари билан ўртоқлашди.

«Ажойиб ўйин бўлди, йигитлар майдонда ўзларини жуда яхши кўрсатишди. Улар учун жуда хурсандман. Бу ғалаба стадионга келиб, жамоамизни қўллаб-қувватлаган мухлислар учун ҳам муҳим эди.

Пеналтидан гол ура олмаслик — хатолик. Афсуски, футболда бундай ҳолатлар учраб туради. Аммо биз хотиржамликни сақлаб қолдик ва ўзимизга хос услубда ўйнашда давом этдик. Энг муҳими ҳам шу.

Бошимда турли фикрлар кўп. Бу ғалабанинг аҳамияти маълум бир чегарагача, холос. Энди биз Белгияда ҳам албатта ғалаба қозонишимиз керак. Ишлашда давом этишимиз лозим, олдинда ҳали узоқ йўл бор. Йигитлар биринчи ўйиндаги мағлубият учун реванш олишни исташмоқда.

Аста-секин ўз мақсадимизга эришамиз. Бугун майдонда кўрганларим менга ёқди. Ўйин бошидаёқ тўп ўтказиб юбордик, аммо учрашув бизнинг фойдамизга янада йирикроқ ҳисобда якунланиши ҳам мумкин эди», — дея Манчинининг сўзларини келтиради Жанлука Ди Марцио.

Сўнгги тур олдидан Италия гуруҳда 10 очко билан пешқадамлик қилмоқда. Францияда ҳам шунча очко бор. Белгияда 9 очко мавжуд.