Макрон Венгерни FIFA президентлиги учун сайловда қатнашишга кўндиради

Франция президенти Эммануэл Макрон Арсен Венгернинг FIFA президенти лавозимига номзодини қўйишини қўллаб-қувватламоқда.

Аввалроқ «Арсенал»нинг собиқ бош мураббийи сайловларда иштирок этишга розилик бериш арафасида экани ҳақида хабар берилганди.

Тhе Теlegraph нашрининг ёзишича, Макрон ватандоши билан боғланиб, уни Жанни Инфантинога рақобатчи бўлишга кўндиришга уринган. Шунингдек, у бошқа давлат раҳбарларини ҳам Венгер номзодини қўллаб-қувватлашга чақиришга тайёр. Бироқ Арсеннинг якуний қарори ҳозирча номаълум.

Таъкидланишича, Макроннинг Венгерни очиқ қўллаб-қувватлаши Франция президенти билан муносабатлари кескинлашган Африка давлатларида акс таъсир кўрсатиши мумкин.

Агар франциялик 77 ёшли мутахассис сайловларда қатнашишдан бош тортса, UEFA Япония футбол ассоциациясининг фахрий президенти Козо Ташима номзодини қўллаб-қувватлайди.

Шу билан бирга, яна бир «таниқли шахс» ўз номзодини илгари суриши кутилмоқда. Бундан ташқари, «Тоттенҳэм»нинг собиқ ҳимоячиси Рамон Вега ҳам FIFA раҳбарлиги учун курашмоқчи. Бироқ унинг номзоди рўйхатга олиниши учун зарур бўлган бешта миллий футбол федерацияси томонидан қўллаб-қувватланиши ҳозирча номаълум.

FIFA президентлиги сайлови 2027 йил 18 март куни бўлиб ўтади.