Япония миллий жамоаси бош мураббийи Ҳажиме Мориясу футболчи Такефуса Кубо Бразилияга қарши учрашувда иштирок эта олмаслигини тасдиқлади.
«Кубо Бразилияга қарши баҳсда майдонга тушмайди. У ҳали жамоавий машғулотларга қайтгани йўқ ва ҳозирча фақат якка тартибда югуриш машқларини бажармоқда.
Унинг тезроқ тикланишига умид қиляпмиз ва энг яхши жисмоний ҳолатига қайтиши учун астойдил ишлаяпмиз», — деди 57 ёшли мутахассис.
Маълумот ўрнида, «Реал Сосиедад» юлдузи 15 июнь куни Нидерландияга қарши гуруҳ босқичининг илк учрашуви (2:2)да ассист амалга оширган, аммо чап тиззасидан олган жароҳати сабаб майдонни тарк этишга мажбур бўлганди.
Шундан сўнг 25 ёшли футболчи Тунис ва Швецияга қарши кетма-кет икки ўйинни ўтказиб юборди.
