Франция элчихонаси: «Миллий жамоанинг ЖЧдаги 26 футболчисидан 23 нафари Францияда туғилган»

Франциянинг Испаниядаги элчихонаси мамлакат миллий жамоасининг барча футболчилари француз эканини эслатди.

«Баҳс-мунозарага киришишни истамаган ҳолда айрим фактларни эслатиб ўтишни лозим деб билдик.

Франция миллий жамоасининг барча футболчилари — мамлакат фуқароларидир. 26 нафар ўйинчидан 23 нафари Францияда туғилган. Мамлакат ташқарисида туғилган 3 нафар футболчи ҳам Франция фуқароси ҳисобланади», — дейилади элчихона баёнотида.

Аввалроқ Испаниянинг собиқ бош вазири Мариано Рахой 2026 йилги Жаҳон чемпионати яримфиналидан ўрин олган Францияга қарши ўйин ҳақида гапирар экан, шундай деганди: «Уларда ажойиб таркиб бор, фақат французлар йўқ. Менда биз ғалаба қозонамиз, деган ишонч бор».

Шунингдек, Аргентинанинг Мендоса вилояти вице-губернатори Эбе Касадо Францияни «одобсиз африкаликлар жамоаси» деб атаганди. Кейинчалик амалдор ўз сўзларини ирқий камситиш деб ҳисобламаслигини маълум қилди. Можаро ортидан Франциянинг Аргентинадаги элчихонаси Касадони «persona non grata» (исталмаган шахс) деб эълон қилди.