Франция миллий жамоаси бош мураббийи Диде Дешам ЖЧ-2026 гуруҳ босқичининг 1-турида Сенегал устидан қозонилган 3:1 ҳисобидаги ғалабадан сўнг Усмон Дембеле ва Майкл Олисенинг позициялари алмаштирилганига изоҳ берди.
Учрашувнинг биринчи бўлимидан сўнг Дешам тактик ўзгаришга қўл урди. Натижада Дембеле ўнг қанотга ўтди, Олисе эса марказий ҳудудда ҳаракат қила бошлади.
«Майкл тўп билан қанчалик кўп учрашса, шунчалик яхши. У рақибнинг ҳимоя ва ярим ҳимоя чизиғи орасида тўп қабул қила олади ҳамда ҳужумчиларимизни қулай вазиятга чиқаришни билади. Мен жамоамизнинг ўйини янада яхлит бўлиши учун шундай қарор қабул қилдим», — деди Дешам.
Мазкур тактик ўзгариш ўз самарасини берди. Иккинчи бўлимда Франция ўз устунлигини ошириб, Сенегал дарвозасига учта гол уришга муваффақ бўлди.
Учрашувда Килиан Мбаппе дубл қайд этган бўлса, яна бир голга Бредли Баркола муаллифлик қилди. Сенегал сафида ягона жавоб тўпини Мбае киритди.
Франция гуруҳ босқичининг 2-турида 23 июн куни Ироқ билан, 3-турда эса 26 июн куни Норвегия билан баҳс олиб боради.
