Италия миллий жамоасининг собиқ дарвозабони Жанлуижи Буффон А Сериянинг бугунги ҳолати ва Италия футболидаги муаммолар ҳақида фикр билдирди.
«Илгари А Серия Европа футболи учун мезон эди, унда энг катта юлдузлар ўйнарди. Ҳозир эса, эҳтимол, биз Европадаги бешинчи лигамиз. Аммо босим ўша-ўша. Мураббийлар ҳар якшанба ишидан айрилиш хавфи остида қолади, мухлислар эса хатоларни кечирмайди», — деди Буффон.
Унинг фикрича, А Серия бугунги кунда кўпроқ футболчилар ривожланадиган ўтиш лигасига айланган.
«Биз йирик клублар футболчиларини ривожлантириш учун келадиган транзит чемпионатга айландик. Аммо шунга қарамай, ўзимизнинг ёш футболчиларга ҳам жой топилмаяпти», — дея қўшимча қилди у.
Буффон Италия футболчиларининг савияси пасаймаганини, муаммо футболнинг ўзгарганига мослаша олмасликда эканини таъкидлади.
«Биз кучли футболчиларга эгамиз. Уларнинг кўпи Премер-лигада ҳам муваффақиятли ўйнамоқда. Шунчаки, футбол сўнгги 20 йилда қанчалик ўзгарганини тан олишни истамаяпмиз», — деди собиқ дарвозабон.
Шунингдек, у бугунги футболда кучсиз рақиб қолмаганини мисоллар билан изоҳлади.
«Бугун Боснияга ютқазишингиз мумкин. Германия Эквадор ёки Парагвайга мағлуб бўлиши, Испания эса Кабо-Верде билан дуранг ўйнаши мумкин. Энди фақат тарих билан яшаб бўлмайди», — деди Буффон.
У Норвегия миллий жамоасини ҳам Европанинг энг кучли жамоаларидан бири деб баҳолади.
«Ҳозир Норвегия Испания, Франция ва Англиядан кейинги даражадаги жамоа. Ослода уларга йирик ҳисобда ютқаздик. Уларга қарши майдонга тушганингда, гўёки ўйин 0:1,5 ҳисобидан бошланади. Ижобий натижа учун камида иккита гол уришинг керак», — деди у.
Якунда Буффон Италия миллий жамоасининг асосий муаммоси руҳий босим эканини айтди.
«Янги бош мураббий футболчиларга ўзига бўлган ишончни ва иштиёқни қайтариши, натижага эришиш мумкинлигига уларни ишонтириши керак», — дея хулоса қилди афсонавий дарвозабон.
