ФИФА президенти Жанни Инфантино президентлик муддати якунлангач, FIFA Forward Enterprise (FFE) номли янги ташкилотга комиссар сифатида раҳбарлик қилишни режалаштиргани маълум бўлди.
Тhе Times бош мухбири Мартин Зиглернинг хабарига кўра, Инфантино ушбу лавозимда йилига 30 миллион АҚШ доллари миқдорида асосий маош олиши керак эди. Бу суммага турли бонуслар киритилмаган.
FFE ФИФАнинг тижорат фаолияти ва йирик мусобақалар, жумладан Жаҳон чемпионатини ташкил этиш ҳуқуқларини ўзида бирлаштириши режалаштирилган эди. Шунингдек, ушбу компания улушининг бир қисмини хусусий инвесторларга сотиш ҳам кўзда тутилганди.
Бироқ лойиҳа футбол раҳбарлари, конфедерациялар ва бошқа манфаатдор томонларнинг кескин норозилигига учради. Бойкот таҳдидлари ва ФИФА ичидаги келишмовчиликлардан сўнг ташаббус бекор қилинди.
Аввалроқ ОАВ Инфантинонинг ушбу режа орқали шахсан ўзи ҳам ўнлаб миллион фунт стерлинг даромад олиши мумкинлиги ҳақида хабар берган эди. Шунингдек, лойиҳа юзасидан АҚШ президенти Доналд Трамп маъмуриятига яқин шахслар билан музокаралар ўтказилгани ҳам маълум қилинган.
