«Barselona» vingeri Lamin Yamal Chempionlar Ligasi umumiy bosqichining ikkinchi turida «Galatasaroy» ustidan qozonilgan 4:1 hisobidagi g‘alabadan keyin o‘z taassurotlari bilan o‘rtoqlashdi. Ikki golli uzatmani amalga oshirgan ispaniyalik futbolchi bahsning eng yaxshi o‘yinchisi deb topildi. Uning so‘zlarini Barca Universal nashri keltirmoqda.
«Men doimo gol urishga intilaman. Bu yerda qanday stadion borligini bilardik — bu o‘ynash eng qiyin bo‘lgan maydonlardan biri. Kiyinish xonasida ularning qanday pressing qilishi va tribunalar qanchalik shovqin solishini muhokama qildik. Tanaffusgacha gol urganimiz muhim bo‘ldi. Agar ularning ikkinchi goli bekor qilinmaganida, ancha qiyin bo‘lardi. G‘alabadan juda xursandmiz. «Galatasaroy» kuchli jamoa», — dedi Yamal.
Ma’lumot uchun, «Barselona» Istanbuldagi bahsda 4:1 hisobida g‘alaba qozondi. Yamal ikkita golli uzatma bilan jamoasining muvaffaqiyatiga katta hissa qo‘shdi.
Eslatib o‘tamiz, kataloniyaliklar Chempionlar Ligasining navbatdagi turida «PSJ»ga qarshi maydonga tushadi.
