Superliganing 14-turida «So'g'diyona» Toshkentda «Lokomotiv»ga qarshi maydonga tushdi. O'yin esa 3:1 hisobida maydon egalarining foydasiga hal bo'ldi.
Mag'lub bo'lgan «So'g'diyona» ustozi Ulug'bek Baqoev matbuot anjumanida ishtirok etdi.
- O'yin haqidagi fikringiz?
- Birinchi bo'limda gol urish uchun juda ko'p vaziyatlar yaratdik, ammo ulardan foydalana olmadik. Menimcha, «Lokomotiv»ning bir yoki ikkita vaziyati bo'ldi, aniq eslolmayman. Ikkinchi bo'lim boshida ham yaxshi imkoniyatga ega bo'ldik, lekin uni ham golga aylantira olmadik. Keyin esa omadsiz holat yuz berdi - penalti belgilandi, undan keyin yana bir penalti bo'ldi. Ikki to'p farqi yuzaga kelgach, «Lokomotiv» uchun o'ynash ancha osonlashdi. Bizda yana imkoniyatlar bo'ldi, ammo ulardan ham foydalana olmadik. Shunga qaramay, futbolchilarning o'yiniga hech qanday e'tirozim yo'q. Faqat gol urish borasida oqsadik. Endi keyingi uchrashuvga tayyorgarlik ko'ramiz va bunday xatolarni takrorlamaslikka harakat qilamiz.
- Birinchi bo'limda jamoangiz raqibdan yaxshiroq harakat qildi. «Lokomotiv» himoyachilari go'yoki Doriyevning gol urishini ko'proq istayotgandek taassurot uyg'otdi. Ularning xatolari ham ko'rindi. Nega pressingni kuchaytirmadingiz?
- Har bir jamoaga qarshi bir xil pressing o'ynab bo'lmaydi. Ba'zi jamoalarga qarshi buni amalga oshirish oson, ba'zilariga esa juda qiyin. «Lokomotiv» shunday jamoalardan biri. Chunki ularning darvozaboni juda yuqorida o'ynaydi va himoyachilar bosim ostida qolsa ham darvozabon orqali to'pni chiqarib ketish imkoniyatiga ega. Ular pressdan juda yaxshi chiqib ketadi. Shu sababli bugungi o'yin uchun asosiy vazifamiz pressing qilish emas edi. Faqat raqib noqulay vaziyatga tushgan paytlarda bosim uyushtirishni rejalashtirgandik.
- G'alaba qozonish mumkin bo'lgan uchrashuvda mag'lub bo'ldingiz. Jamoaga g'alaba uchun nima yetishmayapti? Mahoratmi?
- Ha, ehtimol mahorat. Yana nima deyish mumkin? Bugun Doriyevni markaziy hujumchi sifatida o'ynatdik. Agar e'tibor bergan bo'lsangiz, u besh-olti marta gol urish imkoniyatiga ega bo'ldi. Bu shuni anglatadiki, u to'g'ri joy tanlayapti va jamoa unga vaziyat yaratib beryapti. Lekin bugun aynan yakunlashda mahorat yetishmadi. Har bir futbolchida ham, har bir jamoada ham pasayish davri bo'ladi. Shuning uchun bundan fojea yasamaymiz. Men jamoamning o'yinidan mamnunman. Futbolchilarning harakatiga, fidoiyligiga e'tirozim yo'q, ayrim epizodlarni hisobga olmaganda. Sizning savolingizga javob shuki: mahorat bo'lsa — gol urasiz, mahorat yetishmasa — ura olmaysiz. «Lokomotiv»ni bugungi g'alaba bilan tabriklayman va keyingi o'yinlarida omad tilayman.
- Oxirgi ikki o'yinda jamoangiz sakkizta gol o'tkazib yubordi. Shu bilan birga, «So'g'diyona»ga kelganingizdan keyin jamoa avvalgiga qaraganda ochiqroq futbol o'ynayotgandek. Bu individual ijrochilar bilan bog'liqmi?
- Hozirgi futbolda barcha jamoalar ham himoyalana oladi, ham hujum qila oladi. Futbol o'zgarib boryapti. Ba'zi vaziyatlarda himoyalanamiz, ba'zi vaziyatlarda hujum qilamiz, ayrim paytlarda esa o'yinni nazorat qilamiz. Albatta, ikki o'yinda sakkizta gol o'tkazib yuborish yaxshi holat emas. Ammo futbolda bunday pasayishlar bo'lib turadi. O'tgan safar beshta gol o'tkazdik, bugun esa uchtasi. Bu borada ishlaymiz. Balki muvozanat yetishmagandir yoki boshqa omillar ta'sir qilangandir. Bugungi uchrashuvda ikkita penalti hal qiluvchi omillardan biri bo'ldi. Bu biroz omadsizlik ham edi. Menimcha, o'yin jihatidan biz yutqazmadik, ammo hisobda yutqazdik. Futbolda gol urganda jamoa g'alaba qozonadi.
- Ikkinchi bo'limda, taxminan 70-daqiqalarda suv tanaffusi paytida muxlislar tomonidan e'tirozlar bo'ldi. Shunday vaziyatlarda nimalarni his qilasiz?
- Albatta, bu yoqimsiz holat. Odamlar baqirsa yoki turli gaplarni aytsa, bu hech kimga yoqmaydi. Ammo ular shunday qilishni istasa, biz nima ham qila olamiz? Ularga javob bera olmaymiz, ular bilan bahslashmaymiz ham. Bu tarbiya masalasi. Xohlasalar, baqirishaveradi. Bunga qarshi hech narsa qilib bo'lmaydi. Lekin, albatta, bunday holatlar juda yoqimsiz», - deya Ulug'bek Baqoevning so'zlarini keltiradi Tribuna.uz jurnalisti.
