«Barselona» sardori Rafinya Dias klub safida urilgan gollar soni bo‘yicha afsonaviy vatandoshi Ronaldinio bilan tenglashdi.
Braziliyalik futbolchi Chempionlar ligasi umumiy bosqichining 4-turida «Aston Villa»ga qarshi bahsda dubl qayd etdi. U 52 va 64-daqiqalarda raqib darvozasini ishg‘ol qilib, jamoasining 3:0 hisobidagi g‘alabasiga hissa qo‘shdi.
Barca Universal nashrining xabar berishicha, ushbu gollardan keyin Rafinyaning «Barselona» safidagi barcha turnirlarda urgan gollari soni 94 taga yetdi. Shu tariqa u 2003–2008-yillarda kataloniyaliklar sharafini himoya qilgan Ronaldinio bilan tenglashdi.
Ma’lumot uchun, Rafinya ushbu natijaga erishish uchun 190 ta bahsda maydonga tushgan. Ronaldinioga esa 94 ta gol urish uchun 207 ta o‘yin kerak bo‘lgan.
Eslatib o‘tamiz, «Barselona» «Aston Villa»ni 3:0 hisobida mag‘lub etib, Chempionlar ligasi umumiy bosqichida navbatdagi uch ochkoni qo‘lga kiritdi.
Muxlislar bu yangilikni Telegram’da muhokama qilmoqda
Izohlar Telegram’da ochiladi