Madridning «Atletiko» klubi 26 yoshli hujumchi Xulian Alvares mashg‘ulot vaqtida mushak jarohatini olganini ma’lum qildi. Bu haqda klubning X ijtimoiy tarmog‘idagi rasmiy sahifasi xabar berdi.
Argentinalik futbolchi shanba kungi mashg‘ulot yakuniga yaqin noqulaylik sezgani sabab mashg‘ulotni muddatidan oldin tark etgan. Unga mushak cho‘zilishi tashxisi qo‘yilgan.
Eslatib o‘tamiz, Alvares bugun, 13 sentyabr kuni La Liga 5-turi doirasida «Real Sosiyedad»ga qarshi safar bahsini o‘tkazib yuboradi.
Ma’lumot uchun, argentinalik hujumchi yaqin vaqt ichida qo‘shimcha tibbiy ko‘rikdan o‘tadi. Uning jarohati qanchalik jiddiy ekani tekshiruvlardan so‘ng aniqlanadi.
