Dortmundning "Borussiya" klubi hujumchisi Matis Albert Bundesligada o'ynagan eng yosh amerikalik futbolchiga aylandi.
U asosiy jamoa safida 16 yosh, 11 oy-u 5 kunligida debyut qildi. U Germaniya chempionatining 31-tur doirasidagi "Borussiya D" — "Frayburg" (4:0) bellashuvining 88-daqiqasida maydonga tushdi.
Forvard bu orqali avvalgi rekordni yangiladi. Ushbu natija oldin ham "Borussiya D" safida debyut qilgan Jovanni Reynaga tegishli edi, u 2020 yil 18 yanvarda 17 yosh, 2 oy-u 5 kunligida ilk bor maydonga tushgan.
Ma'lumot o'rnida, Albert 2024 yilda "Los-Anjeles Geleksi" yoshlar jamoasidan "Borussiya D" akademiyasiga qo'shilgan va o'tgan yili AQShning 17 yoshgacha bo'lgan milliy jamoasi tarkibida yoshlar o'rtasidagi jahon chempionatida ishtirok etgan.
