Президент Шавкат Мирзиёев Ўзбекистон миллий жамоасининг ЖЧ-2026даги иштироки юзасидан ўз фикрларини билдирди.
«Миллий жамоамизнинг АҚШ ва Мексика майдонларидаги ўйинларини бутун халқимиз билан бир тан-у бир жон бўлиб, катта ҳаяжон билан кузатиб бордик. Футболчиларимиз ФИФА рейтингида 5-ўринда турган Португалия, 13-ўриндаги Колумбия ҳамда таркибида Европанинг етакчи клубларида тўп сураётган кўплаб футболчилар бор Конго ДР жамоасига қарши баҳсларда катта тажриба орттирди, мундиал муҳитини ҳис қилди.
Аббос Файзуллаев ва Элдор Шомуродов Жаҳон чемпионатидаги илк голларини уриб, халқимизга қувонч улашди.
Миллий жамоамизнинг Жаҳон чемпионатидаги иштироки ҳақида турли фикрлар айтилмоқда. Аммо Ватанимиз шарафини ҳимоя қилган футболчиларга ортиқча ҳиссиёт билан эътироз билдириш ёки улардан айб қидириш халқимизга хос эмас. Аксинча, бугун уларни қўллаб-қувватлаш ва руҳлантириш ҳар қачонгидан ҳам муҳим», — деди давлат раҳбари.
Шунингдек, Президент Ўзбекистон футболининг келажаги ҳақида ҳам тўхталиб ўтди. Таъкидланишича, катта ғалабалар ҳали олдинда ва бунинг учун футбол инфратузилмасини ривожлантириш, соҳага инвестицияларни кўпайтириш ҳамда болалар футболига эътиборни янада кучайтириш режалаштирилган.
Бундан ташқари, 2027 йил январ ойида Саудия Арабистонида бўлиб ўтадиган Осиё кубогига тайёргарлик ишлари ҳозирданоқ бошланиши қайд этилди.
«Биз жамоамизга ишонамиз ва ушбу мусобақада ҳам бутун халқимиз билан уларни қўллаб-қувватлаймиз», — деди Президент.
