Суперлиганинг 16-турида «Хоразм» клуби ўз уйида аутсайдер «Машъал»ни қабул қилди ва 2:0 ҳисобида ғалабани қўлга киритди. Мезбонлар устози Сергей Токов ўйин якунлангач, фикрлари билан ўртоқлашди.
- Ғалаба билан табриклаймиз. Учрашув ҳақида фикрларингиз?
- Албатта, ўйин анча шиддатли ва кескин руҳда ўтди. Учрашувни бироз ҳаяжон билан бошладик. Бутун ҳафта давомида ҳам машғулотлар юқори босим остида ўтди. Бугун эса мухлисларимиз учун муносиб ўйин кўрсатишга ҳаракат қилдик.
Менимча, ғалабамизга тўлиқ муносиб бўлдик. Яна бир нечта гол уриш имкониятига ҳам эга эдик. Рақиб ҳам қаршилик кўрсатди, аммо умумий ҳисобда биз яхшироқ ўйин намойиш этдик.
Фурсатдан фойдаланиб, вилоятимиз аҳолиси ва барча мухлисларга жамоани қўллаб-қувватлаётганлари учун миннатдорчилик билдираман. Бу биз учун жуда муҳим. Бугун барча биз билан бирга эди.
- Кейинги ўйин учун қандай режаларингиз бор?
- Кейинги учрашувга асосан Тошкентда тайёргарлик кўрамиз. Чунки рақиб машғулот майдонида ўйнайди, шунинг учун биз ҳам шундай шароитда тайёргарлик олиб боришимиз керак. Албатта, рақибнинг ўйинини ҳам синчиклаб ўрганамиз. Улар анча янгиланган жамоа, таркибига тўрт-беш нафар легионер қўшилган. Жуда яхши ва ташкиллашган жамоа. Бундан аввал улар кетма-кет уч-тўртта ғалабага эришиб, яхши кайфият ва ишонч тўплашган. Биз эса у ерга очко олиш учун борамиз. Олдинги сафар ҳам уларни мағлуб этишимизга оз қолганди. Бу сафар ҳам очко билан қайтиш учун бор кучимизни ишга соламиз.
- Александр Ежов майдонга қайтди. Соғлиги қандай, тўлиқ тикландими?
— Ҳа, шукр, соғлиғи яхши томонга кетяпти. Умуман олганда, ҳаммаси жойида. Фақат битта қизиқ ҳолат бўлди. Гол урилганидан кейин жамоадошлари уни жуда эҳтирос билан табриклашди ва тасодифан жароҳатланган жойига уриб юборишди. Худога шукр, жиддий муаммо бўлмади, ҳаммаси яхши ўтди.
Шу ўринда ҳали ҳам жароҳатдан тикланаётган йигитларга тезроқ соғайиб сафга қайтишларини тилайман», - дея бош мураббийнинг сўзларини келтиради Tribuna.uz журналисти.
