«Манчестер Юнайтед»нинг собиқ ҳужумчиси Уейн Руни жамоа ҳимоячиси Лисандро Мартинеснинг клубдаги вазият ҳақида билдирган фикрларини танқид қилди. Аргентиналик футболчи Чемпионлар Лигаси умумий босқичининг 2-турида «Атлетико»га 0:2 ҳисобида мағлуб бўлинганидан кейин кескин интервю берганди. Бу ҳақда Манчестер Эвенинг Неwс нашри Амazon Prime эфирида айтилган фикрларга таяниб хабар берди.
Руни Мартинеснинг айнан мағлубиятдан кейин омма олдида гапиришга қарор қилгани шубҳали кўринганини таъкидлади. Унинг фикрича, қийин даврда футболчилар, бош мураббий ва мураббийлар штаби бирлашиши керак, клуб раҳбариятидаги муаммоларни эса жамоа ичида муҳокама қилиш лозим.
«Мартинеснинг ҳаммаси олдиндан тайёрлангандек туюлди. Нега у айнан ушбу баҳсдан кейин интервю берди? Унинг ўзи буни хоҳладими? Мен унинг умуман бирор нарса ҳақида гапирганини жуда кам эшитганман. Бу олдиндан режалаштирилгандек, гўё у атрофидагилар билан маслаҳатлашиб, чиқиб шу гапларни айтишга қарор қилгандек кўринди», — деди Руни.
Собиқ ҳужумчи ҳимоячининг жамоадошлари савиясини танқид қилганини ҳам ҳурматсизлик деб баҳолади. Унинг фикрича, жамоа сардори Бруну Фернандеш бундай масалаларда фикр билдириш ҳуқуқига эга бўлиши мумкин, бироқ ҳатто бундай ҳолатда ҳам муаммолар ёпиқ эшиклар ортида ҳал қилиниши керак.
«Футболчилар мураббий билан гаплашади, мураббий эса раҳбарият билан муҳокама қилади. Аммо бу интервю клубнинг ҳозирги вазиятига ёрдам бермайди. Аксинча, жамоа атрофидаги шов-шувни янада кучайтиради: футболчилар норози, беқарор ва жамоадошларига ишонмаётгандек кўринади. Бундай чиқишлар кийиниш хонасидаги бирдамликни бузиши мумкин», — дея Руни сўзларини келтиради нашр.
Маълумот учун, «Манчестер Юнайтед» Чемпионлар Лигаси умумий босқичининг дастлабки икки турида уч очко жамғарган.
Эслатиб ўтамиз, Англия чемпионатининг 6-туридан кейин манкунианликлар олти очко билан турнир жадвалининг 13-поғонасида бормоқда.
