«Реал» клуби машғулотлар вақтида жанжаллашган яримҳимоячилар Федерико Валверде ва Орелиен Чуамени билан хайрлашишни режалаштирмаяпти.
Аввалроқ футболчилар пайшанба кунги машғулотларда кийиниш хонасида муштлашиб кетишгани хабар қилинганди. Натижада Валверде йиқилиб, столга урилган ва шифохонага олиб кетилган, унга чок қўйишга тўғри келган. У бош-мия жароҳати сабаб 14 кунгача майдонга туша олмайди.
Муштлашувдан сўнг «Реал» зудлик билан фавқулодда йиғилиш ўтказган ва кейинчалик интизомий текширув бошлаган. Футболчиларга клубнинг ички қоидалари қўлланилади — эҳтимолий чоралар қаторига жарима, четлатиш, шартномани бекор қилиш ёки сотиб юбориш киради.
El Mundo маълумотига кўра, Мадрид клуби икки футболчининг ҳеч бирини сотиш имкониятини кўриб чиқмаяпти, чунки улар ҳозирги вақтда ҳам, яқин келажакда ҳам жамоанинг муҳим ўйинчилари ҳисобланади. Шу билан бирга, ҳар иккисига нисбатан чора кўрилади.
Шунингдек, клубда айниқса Валверденинг хатти-ҳаракати жиддий ташвиш уйғотмоқда. Чунки Дани Карвахал билан шартнома узайтирилмаса, келаси мавсумда у «Реал»нинг асосий сардорига айланиши кутилмоқда. Клуб уругвайлик футболчидан хулқ-атворини ўзгартиришни кутмоқда.
