Германия миллий жамоаси дарвозабони Мануел Нойер ЖЧ-2026 гуруҳ босқичидан ўрин олган Кюрасаога қарши учрашувни асосий таркибда бошлади.
Шу тариқа, 40 ёшли посбон фаолиятидаги бешинчи жаҳон чемпионатида майдонга тушди. Бу унинг учун мундиаллардаги сўнгги иштирок бўлиши ҳам мумкин.
Ноер илк бор 2010 йил Жанубий Африкада ўтказилган жаҳон чемпионатида қатнашган эди. Ўшанда у «Шалке» шарафини ҳимоя қилган ва турнирдан сўнг Мюнхеннинг «Бавария» клубига кўчиб ўтган.
Германиялик дарвозабон ЖАРдаги мундиалда олти учрашувда майдонга тушган. Орадан тўрт йил ўтиб, Бразилияда ўтган ЖЧ-2014да эса Германия билан жаҳон чемпионига айланган. Нойер ўша турнирнинг барча етти учрашувида майдонга тушганди.
Шунингдек, у Россияда ўтган ЖЧ-2018 ва Қатардаги ЖЧ-2022да ҳам иштирок этган. Германия миллий жамоаси сўнгги икки мундиалда гуруҳ босқичидан нарига ўта олмаган эди.
Нойер замонавий футбол тарихидаги энг яхши дарвозабонлардан бири сифатида эътироф этилади. Унинг бешинчи мундиалдаги иштироки жаҳон футболидаги яна бир тарихий воқеа сифатида қайд этилди.
