Уругвай миллий жамоаси кипери Фернандо Муслера жаҳон чемпионати-2026да йўл қўйган хатолари учун кечирим сўради. Дарвозабоннинг гуруҳ босқичининг турли ўйинларидаги 3 та қўпол хатоси жамоанинг плей-оффга чиқиш имкониятларини йўққа чиқарди. Гуруҳ босқичининг сўнгги турида Уругвай Испанияга 0:1 ҳисобида имкониятни бой берди, ягона гол яна Муслеранинг хатосидан кейин қайд этилди. Дарвозабон танаффус вақтида бош мураббий Марсело Биелсадан иккинчи бўлимга туширмасликни ўзи сўраган.
«Мен ҳеч қачон қийинчиликлардан қочмаганман — доимо муаммога тик қараганман. Мен учун мана шу барча уругвайликлар билан гаплашиб олиш учун имконият. Спорт менга шунчалик азоб беришини тасаввур ҳам қилмагандим — айниқса, тайёргарлик жараёнида бажарилган иш кўлами, меҳнатдан кейин. Кийиниш хонасида йигитларга ҳам, барча бироз тинчланиб олгач, айнан шу нарсани айтдим.
Бугун, кўрилган узоқ тайёргарлигимга қарамай, жаҳон чемпионатида муносиб ўйин кўрсата олмаганимдан афсусдаман. Жамоадошларим олдида ва бутун Уругвай халқи олдида кечирим сўрайман, аммо менинг сўзларимнинг ўзи, катта эҳтимол, бу ҳолатда етарли бўлмайди.
Ҳозир мен энг яқин инсонларим билан қолишим, бор кучимни жамлаб, олдинга ҳаракат қилишда давом этишим керак. Сабаби спорт ва бу позиция шундай: баъзан у жуда кўп нарса беради, баъзида — барчасини олиб қўяди. Мен дуч келган қийинчилигимни қабул қилиб, олдинда кутаётган барчасига тайёр бўлишим муҳим», — дея голкипер сўзларини келтиради TyC Sports.
Маълумот учун, Уругвай миллий жамоаси H гуруҳида учинчи ўринни эгаллаб, мусобақадаги иштирокини якунлади. Саудия Арабистони (1:1) ва Кабо-Верде билан дуранг (2:2) уругвайликларга 2 очко жамғариш имконини берди.
