Миср – Эрон (1:1) учрашувида форсларнинг голига муаллифлик қилган Рамин Ризоён аламли дурангдан кейин кўз ёшларини тия олмади. Форсларнинг 90+6-дақиқадаги голи бекор қилинди, жамоа плей-офф йўлланмасини (3 очко) қўлга киритиши сўроқ остида турибди.
«Нима дейишим мумкин? Нега бундай бўлаётганини билмайман. Бу шунчаки омадсизлик. Бир марта, икки марта, уч марта, тўрт марта, беш марта... Кейинги босқичга чиқишимизга ва халқимиз яна қувончни ҳис қилишига умид қиламан. Чунки халқимиз бундан ҳам яхшироғига муносиб.
Биз боримизни бердик. Ягона истагимиз халқимизни бахтли қилиш эди. Уч ойдан буён ҳеч кимдан ҳеч қандай мукофот ёки эътироф кутмасдан курашаяпмиз. Биз, футболчилар, ҳеч қачон ҳеч кимдан ҳеч нарса сўрамаганмиз. Бу жамоадаги ҳар бир футболчи ор-номусли, мустаҳкам характерли ватанга содиқ инсонлар. Улар фақат халқимизга бўлган меҳри ва уларнинг қалбига қувонч олиб кириш учун курашди, югурди ва борини берди.
Эрон халқи, биз сизларни жуда яхши кўрамиз. Бизни кечиринг. Айта оладиган ягона гапим шу — бизни кечиринг. Барчамиз, футболчилар, бундан қаттиқ афсусдамиз. Биз жуда яхши футбол намойиш этдик, аммо қаерда хато қилганимизни билмайман. Сизлар бу дунёдаги энг яхши нарсаларга муносибсизлар. Биз сизлардан чексиз миннатдормиз ва сизларга ҳамиша содиқмиз», - деди Рамин Ризоён.
Маълумот учун, Эрон уч очко билан учинчи ўринларни эгаллаган энг яхши саккиз жамоадан бири сифатида 1/16 финал йўлланмасини қўлга киритиш умидида бошқа гуруҳлардаги вазиятни кузатмоқда.
