Мирко Еличич: «Менимча, бир очко олганимиздан кўра икки очко йўқотдик»

«Локомотив» ва «Андижон» (3:3) ўртасидаги жанговар дурангдан сўнг мезбонлар устози Мирко Еличич матбуот анжуманида қатнашди.

- Аввало, ўйин ҳақидаги фикрингизни айтсангиз.

- Яхши ўйин бўлди. Менимча, узоқ танаффусдан кейин ҳам иккала жамоа очиқ футбол намойиш этди. Томошабинлар учун қизиқарли учрашув бўлди. Тўп назорати кўпроқ биз томонда эди, ўйинни ҳам назорат қилдик. Фақат сўнгги 15–20 дақиқада назоратни бироз йўқотдик. Натижада, менимча, бугун бир очко олганимиздан кўра, икки очкони йўқотдик. Раҳмат.

- Бугун Шушняр дисквалификация сабаб майдонга тушмади. Унинг йўқлиги сезилдими?

- Буни аниқ айтиш қийин. Шушняр жуда яхши мавсум ўтказяпти, жуда барқарор ўйнамоқда. Кучеренко ҳам шундай. Абдулла ҳам ўтган ўйинда яхши ҳаракат қилганди, бугун ҳам ёмон ўйнади, демаган бўлардим. Балки айрим вазиятларда бошқа футболчиларникидек сифат етишмагандир. Шушняр ва Кучеренко марказда бўлса, сифат бироз юқорироқ бўлади. Бугун эса шу жиҳатдан озгина фарқ сезилди.

- Ўйиннинг бошида «Локомотив»нинг голи бекор қилинди. Ўша вазиятни кўрдингизми?

- Йўқ, ҳали кўрмадим. Биз узоқда тургандик, вазиятни аниқ кўриш қийин эди. Энди ўйинни қайта томоша қиламиз. Менимча, бугун тушунарсиз вазиятлар кўп бўлди. Энг ёқимсизи — ҳакам ўйинни ҳис қилмай қолгани. Агар ҳакам жуда кўп кўзга ташлана бошласа, демак нимадир нотўғри кетмоқда. Мен ҳакам ҳақ ёки ноҳақ эди, демайман. Лекин 50 га 50 вазиятларнинг кўпи "Андижон" фойдасига ҳал бўлгандек туюлди. Бу ҳакамлик сифати билан боғлиқ масала, лекин бу ҳақида кўп гапирмоқчи эмасман.

- Жаҳон чемпионати сабаб катта танаффус бўлди. Энди эса ҳар беш кунда ўйинлар бўлади. Жамоа бунга тайёрми?

- Ҳа, тайёрмиз. Жаҳон чемпионати туфайли икки ойдан ортиқ танаффус бўлди. Фақат кубок ўйинларини ўтказдик. Энди эса чемпионатда ҳар беш кунда ўйин бўлади. Футболчилар бунга тез мослашади. Икки-учта ўйиндан кейин бу ритмга кўникиб кетишади. Агар икки ҳафтада бир ўйин бўлса ҳам, уч кунда бир ўйин бўлса ҳам, барибир футболчи шунга мослашади. Фақат бироз вақт керак. Шунча танаффусдан кейин яна ўйин ритмини ҳис қилиш муҳим. Мен нафақат бизнинг, балки бошқа жамоаларнинг ҳам ўйинларини кузатдим. Интенсивлик ва ўйин сифати ёмон эмас. Менимча, бу танаффус футбол сифатига салбий таъсир кўрсатмаган.

- Ҳисоб 2:0 бўлганда жааоангиз учинчи голни урадигандек эди. Аммо кейин кетма-кет иккита гол ўтказиб юборилди. Бу мувозанатнинг йўқолганиданми?

- Футболда ҳаммасини майда деталлар ҳал қилади. Агар ўша майда вазиятлардан фойдалана олмасангиз, ўйин бирданига ўзгариб кетади. Шундай шиддатли ва тенг ўйинларда битта кичик хато ҳам натижани ҳал қилади.
Бу хатода айнан ким айбдорлигини айтиш нотўғри. Футболда бундай ҳолатлар ҳеч қачон битта футболчининг айби бўлмайди, бу жамоавий хато. Уни таҳлил қилиб, кейинги сафар такрорламасликка ҳаракат қиламиз. Бунга жисмоний ҳолат ҳам, руҳий ҳолат ҳам таъсир қилиши мумкин. Ҳар ким бунга ўзича баҳо беради, лекин бу фақат шахсий фикр, холос.

- «Локомотив» икки йилдан ортиқ танаффусдан кейин яна ўз стадионида Суперлига ўйинини ўтказди. Майдон сифати ҳақида фикрингиз қандай?

- Майдон ёмон эмас. Лекин аввалгидек ҳам эмас. Беш-олти йил олдин бу ерда ўйнаганимизда майдон сифати яхшироқ эди. Ҳозир эса бироз қаттиқ ва тўлиқ текис эмас. Олдин майса юмшоқроқ ва текисроқ эди.
Аммо буни ҳам тушуниш керак: янги майдонга вақт керак. Худди янги қурилган уй сингари, ҳаммаси аста-секин ўз ўрнига тушади. Бироз вақт ўтгач, майдон ҳам керакли ҳолатга келади. Мен бунга ишонаман. Ҳозирча эса унга мослашиш керак.