Аргентина миллий жамоаси сардори Лионел Месси ЖЧ-2026 гуруҳ босқичи 1-турида Жазоир дарвозасини ишғол қилиб, яна бир тарихий натижага эришди.
38 ёшли футболчи ушбу учрашувда хет-трик қайд этиб, Аргентина миллий жамоаси сафида жаҳон чемпионатларидаги голлари сонини оширди.
Шу тариқа Месси миллий жамоа тарихида мундиалларда гол урган энг ёш ва энг ёши катта футболчига айланди.
У илк бор жаҳон чемпионатида 2006 йилда Германияда бўлиб ўтган мундиалда Сербия ва Черногорияга қарши баҳсда 18 ёшида гол урган эди. Орадан роппа-роса 20 йил ўтиб, Месси 38 ёшида Жазоир дарвозасини ишғол қилди.
Бундан ташқари, аргентиналик афсона жаҳон чемпионатлари тарихида гол урган энг ёши катта футболчилар орасида учинчи ўринга кўтарилди.
Бу борадаги рекорд Камерун афсонаси Рожер Миллага тегишли — у 42 ёш-у 39 кунлигида гол урган. Иккинчи ўринда эса Португалия ҳимоячиси Пепе қайд этилган бўлиб, у 39 ёш-у 283 кунлигида мундиалда гол муаллифига айланган.
Месси эса Жазоирга қарши баҳсда 38 ёш-у 357 кунлигида гол уриб, яна бир тарихий натижани ўз номига ёздириб қўйди.
Эслатиб ўтамиз, Аргентина ЖЧ-2026даги илк учрашувида Жазоирни 3:0 ҳисобида мағлуб этди. Баҳснинг барча голларига Лионел Месси муаллифлик қилди.
