Аргентина миллий жамоаси яримҳимоячиси Алексис Мак Аллистер ЖЧ-2026 гуруҳ босқичининг 1-турида Жазоир устидан қозонилган 3:0 ҳисобидаги ғалабадан сўнг Лионел Месси ҳақида фикр билдирди.
Эслатиб ўтамиз, учрашувдаги барча голларга 38 ёшли аргентиналик афсона муаллифлик қилиб, мундиалдаги илк хет-тригини расмийлаштирди.
«Месси энди аввалгидек эмас дейишганди. Аммо бугун у ҳамон энг яхшиси эканини кўрсатди», — деди Мак Аллистер.
Яримҳимоячининг фикрича, Аргентина миллий жамоаси ўз ўйинини айнан Месси атрофида қуриши керак.
«Энди ҳамма кўриб турибдики, биз жамоани унинг атрофида қуришимиз керак», — дея қўшимча қилди у.
Жазоирга қарши хет-трикдан сўнг Месси жаҳон чемпионатларидаги голлари сонини 16 тага етказди ва Германия афсонаси Мирослав Клозе билан биргаликда мундиаллар тарихидаги энг яхши тўпурарлар рўйхатидан жой олди.
Қизиғи, бу Лионел Мессининг фаолиятидаги жаҳон чемпионатларида қайд этган илк хет-триги бўлди.
Аргентина миллий жамоаси гуруҳ босқичининг навбатдаги турида 22 июн куни Австрияга қарши майдонга тушади.
