Килиан Мбаппенинг жароҳатдан тикланиши борасида янги тафсилотлар пайдо бўлди.
Аввалроқ «Реал» ҳужумчиси дам олиш кунлари физиотерапевтлар ва реабилитация мутахассислари билан фаол шуғуллангани ва франциялик футболчининг режаси шу якшанба куни бўлиб ўтадиган класикода майдонга тушиш экани айтилганди.
Мбаппенинг Ла Лига 35-турида иштирок этиши бўйича якуний қарор чоршанба кунги MRT текширувидан кейин қабул қилиниши керак эди. Аммо COPE журналисти Мелчор Руиснинг маълумотига кўра, 27 ёшли форварднинг чап оёқ сон мушакларининг ҳолатини текшириш жараёни пайшанба кунига қолдирилган.
Бугун Килиан машғулот зали ва бассейнда шуғулланган. Эртадан у умумий гуруҳ машғулотларининг бир қисмида иштирок этиши мумкин.
Клубдагилар Мбаппенинг «Барселона»га қарши «Камп Ноу»даги ўйинда майдонга тушишига ишонишмоқда.
