Кэррик: «Қийин дамда ҳам қўллаётган мухлисларни хурсанд қилишимиз керак»

«Манчестер Юнайтед» бош мураббийи Майкл Кэррик жамоани мухлисларни хурсанд қилишга чақирди.

Бугун, 3 ноябр куни манкунианликлар Чемпионлар лигасининг 4-турида «Рома»га қарши майдонга тушади. Жамоа барча мусобақаларда кетма-кет 9 та ўйиндан бери ғалаба қозона олмаяпти.

«Шундай кечалар бўладики, улар ўзига хос ҳис-туйғуларга бой бўлади. Ўйин бошланишидан аввалоқ ҳаяжон ва босим кучаяди. Буни учрашув олдидан, қизиш машқлари вақтида ва ҳуштак чалиниши биланоқ ҳис қиласиз. Бу туйғу бутун ўйин давомида сизни тарк этмайди. Бизга ҳам шундай муҳит керак.

Ўзимизни кўрсатишимиз ва мухлисларга қувонишлари учун сабаб беришимиз керак. Улар «Челси»га (0:2) қарши ўйинда шунчаки ажойиб мухлислик қилишди. Биз ўн киши бўлиб қолганимизга қарамай, иккинчи бўлим давомида тўхтамасдан қўшиқ куйлаб, жамоани қўллаб-қувватлашда давом этишди. Бу ҳақиқий мухлисларга хос фазилатдир.

Клуб улар учун нимани англатиши айнан шундай ҳолатларда намоён бўлади. Қийин пайтларда ҳақиқий синовдан ўтилади. Мухлисларимизнинг сабр-тоқат кўрсатиб, бизга ишонч билдиргани жуда муҳим.

Биз ҳам уларга худди шундай жавоб беришимиз керак. Буни эса бугунги ўйиндан бошлаймиз», — дея Кэррикнинг сўзларини келтиради «МЮ» расмий саҳифаси.