Телебошловчи Пирс Морган «Манчестер Юнайтед»нинг собиқ бош мураббийи Эрик тен Ҳагнинг Криштиану Роналду ҳақидаги фикрларига муносабат билдирди. Нидерландиялик мутахассис португалиялик ҳужумчи сўнгги 7-8 йил давомида аввалги даражасида ўйнай олмаганини айтганди.
Морган эса тен Ҳагнинг бу гапларини ҳасад билан боғлади ва Роналду «Ювентус» ҳамда «Реал»дан кетганидан кейин ҳам юқори натижалар қайд этганини таъкидлади.
«Роналду «Реал»дан кетганидан кейин 330 дан ортиқ гол урди. У «Ювентус»да ҳам жуда муваффақиятли ўйнади, бир нечта чемпионликни қўлга киритди. Менимча, тен Ҳаг Роналду ҳам уни танқид қилгани учун ҳасадга тўла гапларни айтди.
Тен Ҳаг Роналду клубдан кетганидан кейин ҳам бир муддат «Манчестер Юнайтед»ни бошқарганини, аммо барибир муваффақиятга эриша олмаганини эслатмаяпти. Германиядаги янги жамоасида эса атиги 60 кун ишлади. Менимча, тен Ҳаг жуда катта муваффақиятсизликка учради.
«МЮ»ни тарк этишидан олдинги сўнгги мавсумида Роналду АПЛда 18 та, Чемпионлар Лигасида эса 6 та гол урган. Тасаввур қилинг, «Манчестер Юнайтед» ҳозир шундай статистикага эга ҳужумчини қанчалик истаган бўларди. Менимча, Криштиану клубда яна икки-уч йил қолиб, кўплаб голлар уриши мумкин эди.
Агар тўғри мураббий бўлганида, бу ажойиб қайтиш бўларди. Аммо бундай мураббий йўқ эди. Унинг ўрнида Роналдуга ҳурмат билан муносабатда бўлмаган, унга жуда ёмон муомала қилган инсон бор эди. Бу йигитлар Роналду ҳисобига ўзларини кўрсатишга уринмоқда.
Мен Криштианудан бу ҳақда нима деб ўйлашини сўрадим. У фақат тен Ҳаг муҳокама қилишга арзимайдиган инсон эканини айтди», — деди Морган кулиб.
Маълумот учун, Роналду «Манчестер Юнайтед»ни 2022 йил ноябрида тарк этган. Унинг клубдаги сўнгги тўлиқ мавсумида АПЛ ва Чемпионлар Лигасидаги жами голлари сони 24 тани ташкил этган.
Эслатиб ўтамиз, тен Ҳаг Роналду билан боғлиқ муаммони юлдуз футболчиларнинг ҳам жамоа учун ишлаши зарурлиги билан изоҳлаган. Унинг фикрича, португалиялик ҳужумчи АПЛ талаб қиладиган юқори интенсивликка бардош бера олмаган.
