Каннаваро: «Ҳаммага бирдек қарайман, менда асосий таркиб вакили ёки захира футболчиси деган гап йўқ»

Ўзбекистон миллий жамоаси бош мураббийи Фабио Каннаваро Сурияга қарши ўйин (4:1)дан сўнг ўз фикрларини билдириб ўтди.

«Ҳаммага хайрли кеч. Бугун биргаликда ажойиб ҳаракат қилдик. Яхши ўйин бўлди, шу руҳда давом этишимиз керак. Лекин кўп жиҳатларда ривожланишимиз ҳам керак.

Қадамма-қадам ҳаммасини яхшилашга ҳаракат қиляпмиз. Навбатда Жанубий Кореяга қарши баҳс кутиб турибди, бошқа баҳслар каби бу беллашув ҳам қийин ўтиши аниқ.

Ҳаммани бир хил темпда шуғулланишини хоҳлайман. Ҳаммага бирдек қарайман, менда асосий таркиб вакили ёки захира футболчиси деган гап йўқ.

Суриянинг Иорданияга қарши баҳсини кузатдик ва улар 1:1 ҳисобида дуранг ўйнашганди. Шундан келиб чиқиб, жиддий тайёрланишимиз керак эди.

Стандарт вазиятлар ожиз нуқтамиз бўлиб қоляпти? Сиз ҳар доим ҳам мукаммал бўла олмайсиз. Эронга қарши баҳсда биз жуда ажойиб ҳаракат қилдик. Ваҳоланки, рақиб Осиёдаги энг кучли жамоалардан бири.

Самандар Муратбаев ҳақида ҳали бир қарорга келмадик. У Осиё ўйинларидан қайтганидан сўнг бу ҳақда суҳбатлашамиз ва унинг биз билан Жанубий Кореяга кетиш-кетмаслиги бўйича якуний хулосага келамиз.

Жаҳон чемпионатида биз топ миллий жамоаларга қарши баҳс олиб бордик. Биз ушбу беллашувларда интенсив ва агрессив бўлиш муҳим эканини ўргандик.

Биз футболчиларга прессинг қанчалик катта аҳамиятга эга эканини ўргатишга уриняпмиз. Футболда энг муҳими — вақт ва бўш ҳудуд. Прессинг эса шу икки жиҳатдан қанчалик унумли фойдаланиш мумкинлигини кўрсатади.

Жамоам кўрсатаётган ўйинидан жуда мамнунман. Қисқа муддатда янги схемага мослаша олдик. Ушбу тизим остида кечган баҳсларда 7 та гол уришга муваффақ бўлдик. Бу ҳам аҳамиятга молик кўрсаткич.

Ҳозирдан 3 ойдан кейинги ўйинлар ва ундаги эҳтимолий муаммолар ҳақида гапиряпсиз. Биз Осиё кубогида финалга қадар осонроқ йўлдан бориш учун қўлимиздан келганини қиламиз.

Ҳозирдан ҳеч нарса айтиб бўлмайди. Балки Япония муддатидан олдин мусобақани тарк этар, балки бошқа жамоа бошоғриқ бўлишни уддалар.

Айни вақтда эса турниргача ва турнир давомида биз қўлимиздан келган барча ишни қилишимизни айта оламан», — деди Каннаваро.