UEFA «Барселона» билан боғлиқ «Негрейра иши» доирасида «Реал»дан катта ҳажмдаги ҳужжатларни қабул қилиб олганини маълум қилди.
Гап каталонияликларнинг Испания футбол федерацияси Ҳакамлар техник қўмитаси собиқ вице-президенти Хосе Мария Энрикес Негрейра билан боғлиқ тўловлари ҳақида кетмоқда.
UEFA «Барселона»га қарши ушбу масала юзасидан суриштирувни дастлаб 2023 йилда бошлаган эди.
Ташкилот маълумотига кўра, «Реал» тақдим этган ҳужжатлар UEFAнинг этика ва интизом инспекторларига берилган. Улар янги материалларни амалдаги суриштирув доирасида ўрганиб, баҳолайди.
Бунгача «Реал» президенти Флорентино Перес «Барселона»ни ҳакамларга таъсир кўрсатганликда айблаган эди. Каталония клуби эса Негрейра билан боғлиқ тўловлар ҳакамлик бўйича тайёрланган ҳисоботлар ва маслаҳат хизматлари учун амалга оширилганини билдирган.
Ҳозирча UEFA ушбу иш бўйича якуний қарор ёки жазо эълон қилгани йўқ. Аввалроқ «Реал» UEFAдан «Барселона»ни Негрейра давридаги совринлардан маҳрум қилишни сўрагани маълум қилинганди.
