Мадриднинг «Реал» клуби ва Бразилия миллий жамоаси ҳужумчиси Эндрик жамоада етарли ўйин амалиётига эга бўлмаса, клубдан кетиш ҳақида ўйлаши мумкин. Diario AS хабарига кўра, 20 ёшли футболчига Италия клуби «Рома» ҳамон қизиқиш билдирмоқда.
Манбага кўра, «Рома» қишки трансфер ойнасида Эндрикни ижара асосида таркибига қўшиб олишга уриниб кўриши мумкин. Италия клуби аввал ҳам бразилиялик ҳужумчининг хизматларига қизиқиш билдирган.
Эндрикнинг «Реал» билан амалдаги шартномаси 2030 йилнинг ўрталаригача мўлжалланган. Ҳужумчининг трансфер қиймати 40 млн еврога баҳоланмоқда. Бироқ футболчининг Мадрид клубидаги келажаги унинг келгусида қанчалик кўп майдонга тушишига боғлиқ бўлиши мумкин.
Маълумот учун, бразилиялик футболчи ушбу мавсумда Испания чемпионатида ҳозирча 1 та баҳсда майдонга тушган. У мазкур баҳсда гол ёки голли узатма билан ажралиб турмаган.
Эслатиб ўтамиз, Эндрик 2024 йил ёзида Бразилиянинг «Палмейрас» клубидан «Реал»га кўчиб ўтган.
