«Манчестер Сити» директорлар кенгаши раиси Халдун Ал Муборак 2020 йилда Буюк Британияда дипломатик иммунитетга эга бўлган. Financial Times хабарига кўра, ушбу мақом клубнинг молиявий кўрсаткичларини сунъий равишда оширганлик ҳақидаги шубҳалар билан боғлиқ ишлар доирасида Ал Муборакни мамлакат ҳудудида суд таъқибидан сезиларли даражада ҳимоя қилади.
Манба қайд этишича, дипломатик иммунитет Ал Муборакни Буюк Британияда жиноий таъқибдан, шунингдек, аксарият фуқаролик-ҳуқуқий даъволардан ҳимоя қилади. Шу сабабли унга нисбатан ҳуқуқий чоралар кўриш имкониятлари чекланган.
Яқинда Англия Премер-лигаси «Манчестер Сити»ни молиявий қоидаларни бузганлик ҳамда тергов билан ҳамкорлик қилмаганликда айбдор деб топган. Клуб эса айбловларга рози эмаслигини билдирган ва тегишли инстанцияларда ўз позициясини ҳимоя қилишини маълум қилган.
Ушбу қарор ортидан «Манчестер Сити»га қандай жазо қўлланиши ҳозирча расман эълон қилинмаган. ОАВ хабарларига кўра, клуб аввал қўлга киритган чемпионлик унвонларидан маҳрум қилиниши ҳам мумкин.
Эслатиб ўтамиз, «Манчестер Сити» 2008 йилдан буён БААнинг Abu Dhabi United Group компанияси тасарруфида. Шу даврда клуб Премер-лигада 8 марта, Англия кубогида 4 марта ва Лига кубогида 7 марта ғолиб чиққан. Шунингдек, «Манчестер Сити» 2022/23 йилги мавсумда Чемпионлар лигасида ҳам зафар қучган.
Маълумот учун, Financial Times хабарида Ал Муборакнинг дипломатик иммунитети 2020 йилда берилгани қайд этилган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади