Пинту: «Инфантино 2014 йилдаёқ «Сити» ва «ПСЖ»нинг молиявий қоидабузарликларини билган»

Football Leaks асосчиси Руи Пинтунинг айтишича, FIFA'нинг амалдаги президенти Жанни Инфантино «Манчестер Сити» ва «Пари Сен-Жермен»га молиявий қоидаларни бузгани учун жазодан қочишда ёрдам берган.

Ўтган ҳафта «шаҳарликлар» АПЛнинг молиявий қоидаларини бузиш билан боғлиқ деярли барча айбловлар бўйича айбдор деб топилгани ҳақида хабарлар тарқалганди — фақат битта банд бундан мустасно. 2023 йил феврал ойида АПЛ «Сити»ни 2009–2018 йиллар давомида молиявий қоидаларни 115 марта бузганликда айблаганди. Кейинроқ The Times нашри гап 115 эмас, балки 130 та қоидабузарлик ҳақида бораётганини хабар қилди.

29 сентябр куни эса АПЛ клуб барча бандлар бўйича айбдор деб топилганини маълум қилди.

«2014 йилдаёқ «Манчестер Сити» билан боғлиқ қоидабузарликлар ҳақида билган бир инсон бор эди. Ўша пайтда UEFA бош котиби лавозимида ишлаган машҳур Жанни Инфантино ўз ваколатларини суиистеъмол қилди, махфий ҳужжатлар билан тергов палатасини чалғитди. У «Манчестер Сити» ҳам, «ПСЖ» ҳам фақат жарима билан қутулиши, Чемпионлар лигасида иштирок этишни тақиқлашга олиб келиши мумкин бўлган чуқурроқ текширувлардан қочиши учун қўлидан келган барча ишни қилди.

Бу тафсилотларнинг барчаси Football Leaks туфайли ошкор бўлди. Унинг UEFA бош котиби сифатидаги фаолияти ва кейинчалик FIFA президенти сифатидаги ишларини ҳисобга олган ҳолда, мен фақат ўз камтарона фикримни айтишим мумкин: Жанни Инфантино футболнинг «саратон ўсма»сигага айланди ва бу ўйиннинг келажагида унга ўрин бўлмаслиги керак», — дея Пинтунинг сўзларини келтиради BBC Sport.