Жезуш: «Ҳеч ким қароримни ўзгартиришга мажбур қилолмайди — Роналду ҳам, президент ҳам»

Жорже Жезуш Криштиану Роналдунинг Норвегияга (2:1) қарши ўйиндан кейин нега норози бўлганига ойдинлик киритди.

— Нега Криштиану Роналду норози? Агар ҳеч қандай низо бўлмаса, унда нега у ва Проэнса (мамлакат ФФ президенти) билан учрашувлар ўтказилди?

— Ҳеч қандай воқеа бўлмаган. Яна бир бор айтаман. Мен можаролар юзага келишидан қўрқмайман. Фаолиятим давомида бундай ҳолатларни жуда кўп бошдан кечирганман... Лекин бундан муаммо ясаш керак эмас.

Кришга олдиндаги икки баҳсда — Норвегия ва Данияга қарши ўйинларда майдонга тушмаслигини айтгандим. Ўйин вақтида эса, балки, у менга керак бўлиб қолар, деб ўйлаб, уни қизиб туришга юбордим. Кейин эса майдонга туширмадим.

20 ёки 30 дақиқа давомида қизиш машқларини бажариб, кейин майдонга тушмаган ҳар қандай футболчи бундан мамнун бўлмайди. Айниқса, Криш. Ҳатто у Пеле ёки Марадона бўлганида ҳам. 30 дақиқа қизиш — кейин эса майдонга тушмаслик? Қоидалар шундай. Ҳамманинг ҳуқуқи тенг ва мен уни майдонга туширмасликка қарор қилдим.

Аслида бўлмаган зиддият ҳақида гаплашишга мажбур қилишди: «Криш, Португалияда бу ҳақда жуда кўп гапиришяпти, шунинг учун бу масалани муҳокама қилишимизга тўғри келяпти, лекин мен нима бўлаётганини тушунмаяпман», дедим.

Аслида гаплашадиган ҳеч нарса йўқ эди. Биз муҳокама қилган нарса — унинг матбуот анжуманида айтган гаплари эди. У шундай деганди: «Мен бу ерга қарорни сиз қабул қилишингиз учун келганман. Агар ўйнашимни хоҳласангиз — ўйнайман. Агар захирада ўтиришимни хоҳласангиз — захирада ўтираман».

Президентнинг келгани эса табиий ҳолат — у жамоа билан бирга бўлиши керак. Португалияда нима ҳақида гаплашаётганларини эшитгач, у нима бўлганини тушунишни истади. Аммо кечки овқатдан кейин биз бу муаммони аллақачон ҳал қилгандик.

— Сиз унга 30 дақиқа ўйнашини ваъда қилганмисиз?

— Истаган нарсамни ваъда қилишим мумкин. Мен мураббийман. Балки буни тушуниш сиз учун бироз қийиндир. Мен мураббийман ва футболчига унинг ўйинда қатнашмаслигини айтдим: «Сени захирага ўтқазаман. Агар охирги 30 дақиқа давомида сенга эҳтиёж сезилса, майдонга тушасан. Агар эҳтиёж бўлмаса — тушмайсан».

Ҳеч бир футболчи қароримни ўзгартиришга мажбур қила олмайди. На у, на футболдаги бошқа бирор киши.

Ҳеч бир президент ҳам. Ҳеч қачон, ҳеч қандай ҳолатда! — деди Португалия миллий жамоаси бош мураббийи матбуот анжуманида.

Маълумот учун, ушбу матбуот анжуманидан сўнг Роналду миллий жамоа жойлашган базани тарк этди.