АПЛ клублари «Сити»нинг иши шу мавсумнинг ўзида якунланишини хоҳламоқда

«Манчестер Сити»нинг рақиблари «шаҳарликлар» иши шу мавсумнинг ўзидаёқ якунланишини хоҳламоқда.

АПЛ клублари якуний қарор ушбу мавсум тугашидан олдин чиқарилиши, эҳтимолий жазолар эса кейинги мавсумдан кучга киришини истамоқда, деб ёзади The Times.

Клуб раҳбарларидан бири ишни кўриб чиқиш жараёни 2027/28 йилги мавсумгача чўзилиб кетишини «қабул қилиб бўлмайдиган ҳолат» деб атаган.

Эслатиб ўтамиз, ўтган ҳафта «шаҳарликлар» АПЛнинг молиявий қоидаларини бузиш билан боғлиқ деярли барча айбловлар бўйича — фақат биттасидан ташқари — айбдор деб топилгани ҳақида маълумот пайдо бўлди.

2023 йил феврал ойида АПЛ «Сити»ни 2009 йилдан 2018 йилгача бўлган даврда молиявий қоидаларни 115 марта бузганликда айблаганди. Кейинчалик The Times 115 эмас, балки 130 та қоидабузарлик бўлганини хабар қилди.

«Манчестер Сити»да айблов бўйича чиқарилган қарор устидан расмий апелляция бериш учун жума кунигача вақт бор. Ушбу мавсумда жорий этилган Премер-лиганинг янги қоидаларига кўра, апелляцияни кўриб чиқиш жараёни 12 ҳафта ичида якунланиши, якуний хулосалар эса сўнгги эшитувдан кейин 30 кун ичида эълон қилиниши керак.

Бироқ «Сити»нинг юристлари ушбу муддатлар мазкур ишга нисбатан қўлланилмаслиги кераклигини таъкидлаши мумкин. Чунки молиявий қоидабузарликлар бўйича иш янги қоидалар кучга киришидан олдин кўриб чиқила бошланган.