«Сити» бош директори: «Иш очилганига 8 йил бўлди. Ҳал қилиш учун яна анча вақт керак»

«Манчестер Сити» бош директори Ферран Сориано клуб ўзининг айбсизлигини ҳимоя қилишда давом этишини маълум қилди.

Ўтган ҳафта «шаҳарликлар» АПЛнинг молиявий қоидаларини бузиш билан боғлиқ деярли барча айбловлар бўйича айбдор деб топилди — фақат битта банд бундан мустасно. 2023 йил феврал ойида АПЛ «Сити»ни 2009 йилдан 2018 йилгача бўлган даврда молиявий қоидаларни 115 марта бузганликда айблаганди. Кейинчалик The Times нашри гап 115 та эмас, балки 130 та қоидабузарлик ҳақида кетаётганини хабар қилди: Премер-лига айбловларни эълон қилганида, айрим қоидалар бўйича тушунмовчилик юзага келган.

59 ёшли испаниялик менежер Копенҳагенда бўлиб ўтган Европа клублари ассоциацияси йиғилишида нутқ сўзлади. Унинг таъкидлашича, «Сити» мустақил комиссия қарорини қатъиян қабул қилмайди ва апелляция бериш ҳамда зарур бўлса, судга мурожаат қилиш орқали қарорни бекор қилиш учун барча имкониятларини ишга солмоқчи.

Сориано Европанинг бошқа клублари раҳбарларига «шаҳарликлар»нинг Премер-лига томонидан қўйилган айбловларга қарши курашишини маълум қилди. Унинг айтишича, 8 йилдан буён давом этаётган ушбу ишни якуний ҳал қилиш учун ҳали «анча вақт» керак бўлади.

Манба Сорианонинг қуйидаги сўзларини келтирган: «Бу ишга 8 йил кетди ва ҳали яна кўп вақт талаб этилади».