Англия миллий жамоаси бош мураббийи Томас Тухел яримҳимоячи Жюд Беллингҳэм келажакда жамоа сардори бўлиши мумкинми, деган саволга жавоб берди. Мутахассиснинг сўзларини журналист Фабрицио Романо келтирди.
«Агар у Чехияга қарши баҳснинг якуний қисмида сардор бўлган бўлса, демак, бир кун келиб у тўлақонли сардорга айланиши мумкин», — деди Тухел.
Беллингҳэм Англия миллий жамоасидаги дебютини 2020 йилда ўтказган. Шундан буён у 58 та баҳсда майдонга тушиб, 13 та гол урган ва 12 та голли узатмани амалга оширган.
23 ёшли яримҳимоячи Чехияга қарши УEФА Миллатлар лигаси баҳсида ҳам сардорлик боғичини тақди. У 71-дақиқада сардор Ҳарри Кейн ўрнига майдонга тушиб, жамоани баҳснинг қолган қисмида сардор сифатида бошқарди.
Маълумот учун, Англия миллий жамоаси навбатдаги баҳсини 3 октабр куни сафарда Хорватияга қарши ўтказади. Беллашув УEФА Миллатлар лигаси гуруҳ босқичининг 3-тури доирасида бўлиб ўтади.
Эслатиб ўтамиз, Англия миллий жамоаси аввалги турда Чехияни 2:0 ҳисобида мағлуб этган. Ушбу баҳсда Энтони Гордон ва Ҳарри Кейн гол урган.
