ЖЧ-2026 финали олдидан Испания миллий жамоасининг шанба кунги сўнгги машғулоти ноқулай об-ҳаво сабаб кечиктирилди. Бу ҳақда Тhe Athletic хабар берди.
Маълум қилинишича, Ню-Жерси штатининг Уиппани шаҳрида момақалдироқ кузатилгани ва чақмоқ чақиши хавфи туфайли машғулот ўз вақтида бошланмаган. Турнир хавфсизлик протоколига кўра, агар стадиондан 8 мил (тахминан 13 км) радиусда чақмоқ аниқланса, барча машғулотлар вақтинча тўхтатилади.
Дастлаб маҳаллий вақт билан соат 11:00 га режалаштирилган машғулот 11:30 га қолдирилди. Об-ҳаво яхшиланмаса, унинг яна ортга сурилиши ҳам мумкин.
Шунга ўхшаш вазият Аргентина миллий жамоаси машғулотига ҳам таъсир қилиши мумкин. Амалдаги жаҳон чемпионларининг машғулоти Испания базасидан қарийб 8 километр узоқликдаги Морристаун шаҳрида ўтказилиши режалаштирилган.
Сўнгги кунларда Ню-Жерси ва Ню-Йорк ҳудудларида кучли иссиқ, Канададаги ўрмон ёнғинлари оқибатидаги тутун, шунингдек, сув тошқини ва торнадо хавфи кузатилмоқда. Бироқ синоптиклар финал баҳсига қадар ёғингарчилик тутунни тарқатиб юборишини кутишмоқда.
Эслатиб ўтамиз, ЖЧ-2026 финалида Испания ва Аргентина миллий жамоалари ўзаро тўқнаш келади. Баҳс 19 июл куни АҚШнинг «МеtLifе» стадионида бўлиб ўтади. Испания турнир давомида ҳали мағлуб бўлгани йўқ, Аргентина эса 2022 йилда қўлга киритган жаҳон чемпионлиги унвонини ҳимоя қилмоқда.
Мухлислар бу янгиликни Telegram’да муҳокама қилмоқда
Изоҳлар Telegram’да очилади