Бугун Диде Дешам Франция миллий жамоаси бош мураббийи сифатида сўнгги бор жамоани майдонга бошлаб тушади.
Мутахассис 2012 йилда миллий жамоани қабул қилиб олганида, Франция футболи тарихидаги энг оғир даврлардан бирини бошдан кечираётган эди. Жамоа Евро-2008 ва ЖЧ-2010 мусобақаларида гуруҳ босқичидан чиқа олмаган, кийиниш хонасидаги зиддиятлар эса вазиятни янада мураккаблаштирганди.
Бироқ Дешам бошқарувидаги иккинчи йирик турноқнинг ўзидаёқ Франция яна грандлар қаторига қайтди ва Евро-2016 финалига қадар етиб борди.
Дешам давридаги Франция прагматик футболи билан ажралиб турарди. Кўпчилик жамоани эҳтиёткор ва томошабоп бўлмаган услуби учун танқид қилган бўлса-да, бу ёндашув ўз самарасини берди. Франция ЖЧ-2018да чемпион бўлди, УEФА Миллатлар лигаси-2021 ғолибига айланди ҳамда ЖЧ-2022да кумуш медалларни қўлга киритди.
Айнан Дешам қўл остида Килиан Мбаппе, Усмон Дембеле, Н'Голо Канте ва яна бир қатор истеъдодли футболчилар миллий жамоанинг етакчиларига айланди.
Дешам тарихда жаҳон чемпионлигини ҳам футболчи, ҳам мураббий сифатида қўлга киритган учинчи инсон бўлди. Шунингдек, у Франция миллий жамоаси тарихида энг кўп баҳсда бош мураббийлик қилган мутахассис сифатида ҳам тарихга кирди.
Маълумот учун, Франция бугун ЖЧ-2026 учинчи ўрин учун кечадиган баҳсда Англия миллий жамоасига қарши майдонга тушади. Ушбу учрашув Дешамнинг «учранглилар» бошқарувидаги сўнгги ўйини бўлади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади