«Арсенал»нинг собиқ бош мураббийи Арсен Венгер ўз вақтида Килиан Мбаппени Лондон клубига олиб келишга уринганини маълум қилди.
«Мен Килиан Мбаппени «Арсенал»га ўтишга кўндиришга ҳаракат қилганман. Самолёт чиптасини олиб, Монакога учдим. Ўша оқшом унинг уйида ота-онаси билан учрашдим. Улар кўчиб ўтишга деярли тайёр эди. Аммо кейин «Монако» Килиан асосий жамоада имконият олишини тушунишди», — деди Венгер BBC нашрига.
Мбаппе «Монако» асосий жамоасидаги дебютини 2015 йилда, 16 ёшида ўтказган. Кейинчалик у 180 миллион евро эвазига «ПСЖ»га кўчиб ўтиб, ўша пайтда футбол тарихидаги иккинчи энг қиммат трансфер муаллифига айланганди.
Маълумот учун, Килиан Мбаппе фаолияти давомида «Монако», «ПСЖ» клублари ва Франция миллий жамоаси сафида кўплаб совринларни қўлга киритган ҳамда замонавий футболнинг энг ёрқин юлдузларидан бири сифатида эътироф этилади. Ҳозирда эса у «Реал» сафида тўп тепмоқда.
