Франция миллий жамоаси ҳужумчиси Килиан Мбаппе ЖЧ-2026 учинчи ўрин учун Англияга қарши баҳсдан сўнг бош мураббийлик лавозимини тарк этадиган Диде Дешамга мурожаат қилди.
«Бугун сенинг сўнгги рақсинг. Сен бизга жуда кўп нарса бердинг.
Биз сенга бундан ҳам яхшироқ якун ҳадя этишни истагандик, аммо бунинг уддасидан чиқа олмадик. Шу 14 йил давомида жамоамиз учун қилган ишларингни сўз билан ифодалаш жуда қийин. Чунки айнан сен Франция миллий жамоасининг қайта тикланишида ҳал қилувчи рол ўйнадинг.
Одамлар ҳар доим ҳам сенинг буюклигингни муносиб баҳолай олишмади. Аммо вақт ва тарих бунинг ҳақиқий баҳосини беради.
Менга имкон берганинг, шунча йил давомида мамлакатим шарафини энг юксак даражада ҳимоя қилишимга ишонч билдирганинг учун раҳмат. Мамлакатимизнинг энг буюк афсоналаридан бири билан бирга ишлаш мен учун катта шараф бўлди. Биргаликда бошдан кечирган барча лаҳзалар ва эришган ютуқларимиз ҳақида фақат илиқ хотираларим бор.
Сенга янги фаолиятингда омад тилайман ва биз учун жуда қадрли бўлган ушбу либос учун қилган барча ишларинг учун яна бир бор раҳмат», — деб ёзди Мбаппе.
Эслатиб ўтамиз, Диде Дешам 2012 йилдан буён Франция миллий жамоасини бошқариб келмоқда. Унинг қўл остида «учранглилар» ЖЧ-2018 ғолибига айланди, Евро-2016 ва ЖЧ-2022 финалларига чиқди, шунингдек УEФА Миллатлар лигаси-2021 бош совринини қўлга киритди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади