«Манчестер Сити» бош мураббийи Пеп Гвардиола клубни тарк этиши ҳақидаги маълумот оммага тарқалиб кетганидан қаттиқ жаҳли чиққан.
Тhe Sun нашрининг ёзишича, 55 ёшли мутахассис мавсум якунида «шаҳарликлар»ни тарк этишини футболчиларга шахсан тасдиқлаган.
Манбага кўра, бу хабар «Борнмут»га қарши учрашув арафасида матбуотга сизиб чиққани Гвардиолани жиддий ранжитган.
Якшанба оқшомида мураббий футболчилар билан кечки гуруҳ қўнғироғи ташкил қилиб, клубдан кетаётганини маълум қилган.
«Пеп бу маълумот айнан ҳозир ошкор бўлганидан ғазабда. У футболчилар билан боғланиб, кетаётганини тасдиқлади.
Шунингдек, у янгиликларнинг бундай тарзда тарқалганидан узр сўради. Бу ҳолат унинг ўзи учун ҳам кутилмаган бўлган. Шанба куни футболчиларга Пеп қолиши айтилганди, шу сабаб ҳамма шок ҳолатида», — дейди манба.
Аввалроқ Гвардиола «Астон Вилла»га қарши ўйинидан сўнг «Манчестер Сити»ни тарк этиши мумкинлиги ҳақида хабарлар тарқалганди.
