«Манчестер Сити»нинг Англия Премер-лигаси молиявий қоидаларини бузиш билан боғлиқ иш бўйича апелляцияси декабр ойи ўртасида кўриб чиқилади.
Financial Times нашри хабар беришича, эшитув бир неча кун давом этиши мумкин, мустақил комиссиянинг қарори эса 2027 йил январ ойининг дастлабки кунларида эълон қилинади.
Мустақил комиссия апелляция бўйича ўз хулосасини чиқаргач, клубга нисбатан қўлланиладиган санкциялар масаласи ҳал этилади. Бироқ жазо чоралари айнан қачон кучга кириши ҳозирча номаълум. Шунингдек, белгиланадиган санкциялар устидан ҳам апелляция бериш мумкин бўлади. Бу эса жараён янада чўзилишига олиб келиши мумкин.
Аввалроқ «Манчестер Сити»га қўйилган 115 та айбловдан 114 таси бўйича айбдор деб топилгани хабар қилинганди. Айбловлар молиявий маълумотларни нотўғри тақдим этиш, футболчилар ва мураббийларга тўловлар, шунингдек, молиявий назорат талабларига риоя қилмаслик билан боғлиқ.
