«ПСЖ» бош мураббийи Луис Энрике Лига 1нинг 33-тур доирасидаги «Брест»га қарши ўйин (1:0)дан сўнг жамоасининг чемпионлик имкониятларини баҳолади.
«Бизга айнан шу очколар керак эди. Ўйлашимча, биз чемпионлик масаласини ҳал қилдик.
«Ланс»нинг бутун мавсум давомида қандай ўйнаганини эътироф этишимиз керак. Улар жуда кучли қаршилик кўрсатди, бизга ростан қийин бўлди.
Сўнгги икки мавсумда осонроқ эди. Энди эса «ПСЖ» либосини кийган ҳар бир футболчи тайёр бўлиши керак.
Шунинг учун «Ланс»га қарши ўйинга ҳам худди шундай ёндашамиз, аммо ўйинчиларнинг юкламасини ҳам назорат қилишимиз шарт. Асосий мақсад — Чемпионлар Лигаси финали.
Биз ҳали ҳам Мюнхендан кейинги ҳолатдан тўлиқ чиқиб кетмадик. Фикрларимиз ҳали ҳам ўша ерда, шунинг учун бу ўйинга тайёргарлик кўриш қийин бўлди.
Кийиниш хонасида байрам қилмадик, чунки олдимизда яна бир ўйин бор. Мавсумдаги энг муҳим беллашувлардан бири бизни кутмоқда», — деди Энрике L’Équipe нашрига берган интервюсида.
Қайд этиш лозим, чемпионат якунланишига 2 тур қолганида парижликлар 2-ўриндаги «Ланс»дан 6 очкога олдинда бормоқда. Қолган ўйинларда камида 1 очко тўплаш «ПСЖ»га чемпионликни кафолатлайди.
