Александр Хомяков: «Кучли рақибни мағлуб этганимиздан жуда хурсандмиз»

«Бухоро» клуби Суперлиганинг 18-турида ўз уйида «Нефтчи»га қарши муҳим беллашувда қойилмақом ўйин намойиш қилиб, амалдаги чемпион устидан 4:1 ҳисобида ғалаба қозонди. Ўйиндан кейин ғолиб жамоа устози Александр Хомяков матбуот анжуманида иштирок этди.

- Александр Андреевич, сизни ғалаба билан табриклайман. Ўйин ҳақидаги фикрларингиз?

- Албатта, мен ҳам сизларни ғалаба билан табриклайман. Бизни қўллаб-қувватлаган мухлисларни, жамоамизни, футболчиларимизни, умуман, бу ғалабани қўлга киритишда бевосита иштирок этган барча инсонларни табриклайман.

Ҳа, жуда ёқимли. Жуда хурсандман. Йигитлар яна бир бор ўз характерини, яна бир бор сабр-тоқатини намоён қилишди. Биринчи бўлимда, тахминан 15-дақиқадан кейин ўйинимиз унчалик силлиқ кечмаётган пайтлар ҳам бўлди. Агар ўша вазиятда гол ўтказиб юборганимизда, ҳаммаси бошқача тус олиши мумкин эди. Лекин, шукрки, рақибнинг босимига бардош бера олдик. Жуда ажойиб жамоа, кучли жамоа, ҳужумкор жамоа. Шунинг учун бугун жуда қийин бўлди.

Яна бир бор таъкидлайман: бу ғалабада йигитларнинг ҳиссаси катта. Улар интизомли ўйнашди, ўз вазифаларини тўлиқ бажаришди, режа асосида ҳаракат қилишди. Охир-оқибат ўз имкониятларимизни кутдик, рақибнинг хатоларидан фойдаландик ва буни амалга ошира олдик.
Шунинг учун бундай кучли рақибни мағлуб этишга эришганимиздан жуда хурсандман. Яна бир бор барчани ғалаба билан табриклайман!

- Филипович ва Младовичнинг жароҳати жиддийми?

- Йўқ, зарба олган, лекин унчалик жиддий эмас. Умид қиламанки, бир ҳафтадан кейин у умумий гуруҳда машғулотларга киришади ва кейинчалик бизга ёрдам бера олади. Аниқ айтиш қийин, лекин эҳтимол, тикланишига камида икки-уч ҳафта, балки ундан ҳам кўпроқ вақт кетиши мумкин. Умуман олганда, таркиб билан боғлиқ муаммолар бор, албатта. Қийин, лекин шунга қарамай, қўлимиздаги барча имкониятлардан фойдаланиб, вазиятдан чиқяпмиз. Яна бир бор айтаман. Раҳмат, йигитлар!», - дея Хомяковнинг сўзларини келтиради Tribuna.uz мухбири.