Улуғбек Бақоев: «Агар дуранг бўлганида ҳам бу биз учун яхши натижа ҳисобланарди»

Зоминда «Сўғдиёна» клуби Навоийнинг «Қизилқум» жамоасини қабул қилди. Оғир ўтган беллашувда жиззахликлар 2:1 ҳисобида ғалаба қозониб, ўта муҳим уч очкони қўлга киритди. Шундай қилиб, мезбонларнинг ғалабали серияси давом этяпти. Ўйиндан сўнг «Сўғдиёна» устози Улуғбек Бақоев қуйидагича фикр билдирди:

- Бугун биз ўйинга қадар бу оғир учрашув бўлишини билардик. Рақибимиз «Қизилқум» бўлгани учун эмас, балки жамоанинг жисмоний ҳолати нуқтаи назаридан шундай эди. Ҳар тўртинчи-бешинчи кунда ўйинлар бўляпти, тикланиш эса жуда қийин.

Шу сабабдан оғир ўйин бўлишини билардик. Учрашув бошидаёқ «Қизилқум» ҳимоямиздаги қўпол хатодан кейин дарҳол гол уриши мумкин эди.
Умуман олганда, биринчи бўлимда тенг ўйин бўлди, бир қатор вазиятлар юзага келди. Аммо Люпчо Дориевнинг вазиятлардан фойдаланиши юқори бўлди.

Иккинчи бўлимда «Қизилқум» ўйинни кучайтирди, гол урди, яна гол уриши ҳам мумкин эди. Улар устунлик қилди ва бир қатор алмаштиришларни амалга оширди. Бизнинг алмаштиришларимиз эса ўйинимизни кучайтирди. Гол урдик ва ғалаба қозондик. Йигитларга ўзини аямагани, умуман олганда, кўрсатган ўйини учун катта раҳмат айтаман. Лекин бугун, агар менинг фикримни сўрасангиз, ҳатто дуранг натижа ҳам биз учун яхши натижа бўлган бўлар эди. Аммо биз ғалаба қозондик. Шунинг учун йигитларга катта раҳмат айтаман.

Энди чемпионатдаги кейинги ўйинларга тайёрланишда давом этамиз. «Қизилқум» жамоасига ҳам бугунги яхши ўйини учун раҳмат айтаман ва кейинги учрашувларида омад тилайман», - дея Бақоевнинг сўзларини келтиради Tribuna.uz журналисти.