Александр Хомяков: «Сабр қилиб, ўз имкониятларимизни кутиш жуда муҳим эди»

«Бухоро» клуби ўз майдонида ОКМКни қабул қилиб, 2:0 ҳисобида муҳим ғалабани қўлга киритди. Ушбу баҳсдан кейин бухороликлар бош мураббийи Александр Хомяков қуйидаги фикрларни билдирди:

— Аввало, сизларни ҳам ғалаба билан табриклайман. Ўйин жуда оғир кечди. Албатта, осон бўлмаслигини олдиндан тахмин қилгандик. Рақиб жамоа, менинг назаримда, яхши ўйин кўрсата оладиган жамоалардан бири. Уларга қарши ҳаракат қилиш жуда қийин бўлди.

Яхшиямки, яна бир бор йигитлар сабр-тоқат намоён қилишди. Бугун сабр қилиш, ўз имкониятларимизни кутиш жуда муҳим эди. Биз айнан шу вазиятларни кутишимиз керак эди.

Умуман олганда, ҳамма нарса ҳам режа бўйича кечмади. Биринчи таймда икки нафар ҳимоячимиздан айрилдик. Кейин ўйин охирида яна бир ҳимоячимиз қизил карточка олди.

Шунга қарамай, жуда ҳиссиётларга бой, кўп куч талаб қилган ўйин бўлди. Яна бир бор айтаман, йигитлар ҳақиқий қаҳрамонлик кўрсатишди. Ўйин охиригача бардош бериб, ғалабани қўлга киритишди. Бунинг учун уларга катта раҳмат айтаман», - дея Хомяковнинг сўзларини келтиради Tribuna.uz журналисти.