Belgiya milliy jamoasi bosh murabbiyi Mark van Bommel Italiyaga qarshi uchrashuvda (2:0) yarimhimoyachi Kevin De Bryuynening namoyish etgan o‘yiniga yuqori baho berdi.
«De Bryuyne jahon chempionatidagiga qaraganda yaxshiroq o‘ynadi. Bu mening xizmatim emas, balki uning o‘ziga bog‘liq. Haqiqatan ham Kevin hozir jahon chempionatidagidan kuchliroq ekanini hisoblayman.
Har bir futbolchi o‘z vazifasini bilsa va undan talab qilinayotgan ishni bajarsa, bizda Kevin kabi o‘yin taqdirini hal qila oladigan futbolchi bor. U hamon Belgiya futboli tarixidagi eng yaxshi futbolchi bo‘lib qolmoqda», — dedi van Bommel.
Eslatib o‘tamiz, 35 yoshli futbolchi Italiyaga qarshi bellashuvda maydonda qariyb bir soat davomida harakat qildi. Belgiya safarda o‘ynaganiga qaramay, raqibini yengishga muvaffaq bo‘ldi. Rimdagi bahsda Godts va Lukebio gollarga mualliflik qildi.
