«Koventri Siti» bosh murabbiyi Frenk Lempard Angliya chempionatining 11-turi doirasida «Everton»ga qarshi kechgan va 1:3 hisobidagi mag‘lubiyat bilan yakunlangan bahsdan so‘ng hakamlar brigadasi hamda VAR faoliyatini tanqid qildi. Bu haqda Sky Sports xabar berdi.
Lempard birinchi bo‘limda Jeyms Tarkovski raqib futbolchisi Yirenkani jarima maydonchasi ichida sochidan tortgan vaziyatda penalti belgilanmagani yuzasidan e’tiroz bildirdi. Uning fikricha, himoyachining harakati raqibning to‘p uchun sakrashiga xalaqit bergan va bu qoida buzilishi edi.
Shuningdek, murabbiy Tayvo Avoniynining yorib kirishi vaqtida Vitaliy Mikolenko tomonidan to‘xtatilgan vaziyatni ham eslatdi. Lempard hujumchining tizzasi jarima maydonchasi chizig‘ida bo‘lganini, chiziq esa jarima maydonchasining bir qismi hisoblanishini ta’kidladi.
Bundan tashqari, murabbiy «Everton»ning ikkinchi goli Barri tomonidan qo‘l bilan o‘ynalganidan keyin urilganini da’vo qildi.
«Noliyotgan odamga o‘xshashni istamayman. O‘zim ham «Everton»da ishlaganman va hakamlarning qarorlari bahs taqdirini qanday o‘zgartirishini bilaman. Muhim xatolar o‘yinni izdan chiqarganida, bu juda katta umidsizlikka sabab bo‘ladi. VAR aynan shunday bahsli vaziyatlar uchun mavjud, ammo bugun tizim o‘z vazifasini bajarmadi», — dedi Lempard.
Ma’lumot uchun, «Everton» safida bahsning 56 va 61-daqiqalarida Tierno Barri, 81-daqiqasida esa Kirnan Dyuzberi-Xoll gol urdi. «Koventri Siti»ning yagona goliga 52-daqiqada Gbovu mualliflik qildi.
Eslatib o‘tamiz, bahs 6-noyabr kuni Angliya chempionati doirasida bo‘lib o‘tdi va «Everton» 3:1 hisobida g‘alaba qozondi.
