«Ковентри Сити» бош мураббийи Френк Лемпард Англия чемпионатининг 11-тури доирасида «Эвертон»га қарши кечган ва 1:3 ҳисобидаги мағлубият билан якунланган баҳсдан сўнг ҳакамлар бригадаси ҳамда VAR фаолиятини танқид қилди. Бу ҳақда Скй Sports хабар берди.
Лемпард биринчи бўлимда Жеймс Тарковски рақиб футболчиси Йиренкани жарима майдончаси ичида сочидан тортган вазиятда пеналти белгиланмагани юзасидан эътироз билдирди. Унинг фикрича, ҳимоячининг ҳаракати рақибнинг тўп учун сакрашига халақит берган ва бу қоида бузилиши эди.
Шунингдек, мураббий Тайво Авонийнининг ёриб кириши вақтида Виталий Миколенко томонидан тўхтатилган вазиятни ҳам эслатди. Лемпард ҳужумчининг тиззаси жарима майдончаси чизиғида бўлганини, чизиқ эса жарима майдончасининг бир қисми ҳисобланишини таъкидлади.
Бундан ташқари, мураббий «Эвертон»нинг иккинчи голи Барри томонидан қўл билан ўйналганидан кейин урилганини даъво қилди.
«Нолиётган одамга ўхшашни истамайман. Ўзим ҳам «Эвертон»да ишлаганман ва ҳакамларнинг қарорлари баҳс тақдирини қандай ўзгартиришини биламан. Муҳим хатолар ўйинни издан чиқарганида, бу жуда катта умидсизликка сабаб бўлади. ВАР айнан шундай баҳсли вазиятлар учун мавжуд, аммо бугун тизим ўз вазифасини бажармади», — деди Лемпард.
Маълумот учун, «Эвертон» сафида баҳснинг 56 ва 61-дақиқаларида Тиерно Барри, 81-дақиқасида эса Кирнан Дюзбери-Холл гол урди. «Ковентри Сити»нинг ягона голига 52-дақиқада Гбову муаллифлик қилди.
Эслатиб ўтамиз, баҳс 6 ноябр куни Англия чемпионати доирасида бўлиб ўтди ва «Эвертон» 3:1 ҳисобида ғалаба қозонди.
