«Bavariya» bosh murabbiyi Vensan Kompani darvozabon Manuel Noyerning Chempionlar Ligasi doirasida «Viking»ka qarshi uchrashuvda ishtirok etishi so‘roq ostida ekanini ma’lum qildi.
«Augsburg»ga qarshi o‘yindan keyin uning noqulaylik his qilayotganini bildik. Bu qancha vaqt davom etishini aytish qiyin, ammo u kecha ham, bugun ham mashg‘ulotlarda qatnashmadi.
O‘zini oqlamaydigan tavakkalga borishdan ma’no yo‘q. Uning o‘yin uchun qaydnomaga kiritilishini bilmayman, ammo asosiy tarkibda maydonga tushish ehtimoli juda past. Keyin vaziyatga qarab ish tutamiz.
Biz Manuel mashg‘ulotlarga qaytadi deb umid qilgandik. Buni jarohat deb atashni istamayman, ammo u hanuz noqulaylik his qilmoqda va ahvolida yaxshilanish yo‘q.
Vaqti kelib, chora ko‘rish kerakligini tushunasan. Agar u 100 foiz tayyor bo‘lmasa, uning sog‘lig‘ini xavf ostiga qo‘ymaymiz», — deya Kompanining so‘zlarini keltiradi «Bavariya» rasmiy sayti.
Eslatib o‘tamiz, myunxenliklarning Bundesliga doirasida «Augsburg»ga qarshi o‘tgan avvalgi uchrashuvi 2:2 hisobida yakunlangandi. Ushbu bahsning dastlabki soniyalarida Noyer yo‘l qo‘ygan xato Germaniya chempionati tarixidagi eng tezkor golga sabab bo‘lgandi.
Ma’lumot o‘rnida, «Viking» va «Bavariya» jamoalari o‘rtasidagi uchrashuv 13-oktyabrdan 14-oktyabrga o‘tar kechasi Toshkent vaqti bilan soat 00:00 da boshlanadi.
