Qiziqarli o'tgan "Paxtakor" va "Buxoro" (2:2) o'rtasidagi uchrashuvdan keyin mehmonlar bosh murabbiyi Aleksandr Xomyakov matbuot anjumanida savollarga javob qaytardi.
- Avvalo o'yin haqidagi taassurotlaringiz. Izoh bersangiz.
- Albatta, juda xursandman. Eng avvalo, yigitlar nima uchun maydonga tushganini yaxshi anglayotganidan mamnunman. Rostini aytsam, tanaffusdan keyin hisob 0:2 bo'lib turganida, bu o'yinni qutqarishimizga unchalik ishonmagan edim. Lekin men doim aytib kelganimdek, yigitlar ongli, mas'uliyatli. Ular xarakter ko'rsatishdi, kurashishdan to'xtamadi va natijada hisobni tenglashtirib, poytaxtdan bir ochko bilan qaytishga erishdik. Buning uchun ularga katta rahmat.
- Endi oldinda "Buxoro" uchun navbatdagi o'yin turibdi. Bugun "Paxtakor"ni deyarli 70 daqiqa himoyalanishga majbur qildingiz. Demak, ularga qarshi ma'lum bir yondashuvni topgansiz. Hozir kamtar bo'lib, "yigitlar o'zlariga ishondi" deyapsiz. Lekin jamoangiz o'yiniga qarasak, taraqqiyot bosqichma-bosqich ko'rinib turibdi.
- Albatta, bizda muayyan reja bor edi va shu rejani amalga oshirishga harakat qildik. Afsuski, gol o'tkazib yubordik. Tabiiyki, hisobda ortda qolib ketsak, qanday harakat qilishimiz haqida ham rejamiz bor edi. Bu holatda tavakkal qilishga to'g'ri kelardi. Lekin tayyorgarligimiz va taktikamizning barcha jihatlarini ochib bermayman. Eng muhimi, birinchi bo'limdan keyin shoshilib ketmaslik, tanaffusdan keyin ham o'z rejamizdan og'ishmaslik va o'yin oxirida bosimni kuchaytirish edi. Aynan shuni ko'zlagan edik.
Biz raqibning to'pni yaxshi nazorat qilishini, uni oldinga olib chiqishini va kuchli pressing qila olishini yaxshi bilardik. Bunday zich taqvimda bunday jamoaga qarshi butun o'yin davomida pressing qilish juda qiyin. Shuning uchun pressingni faqat kerakli paytlarda qo'llashni rejalashtirgan edik.
Eng muhimi, yigitlar hisobni darhol tenglashtirish uchun shoshilmadi. Aks holda bu og'ir oqibatlarga olib kelishi mumkin edi. Ular intizomli ravishda rejaga amal qildi va o'yin so'nggida raqibni bosim ostiga olib, hisobni tenglashtira oldik.
- Endi keyingi uchrashuvga qarshi o'yinga tayyorgarlik qanday kechadi?
- Hech qanday o'zgarish yo'q, odatdagidek tayyorgarlik ko'ramiz. Zaxiradagi ham, asosiy tarkibdagi ham barcha futbolchilar o'z vazifasini yaxshi tushunadi. Men har doim yig'in oldidan ham aytaman: o'yinni bir o'n birlik boshlaydi, lekin uni boshqa futbolchilar yakunlaydi. Zamonaviy futbolda zaxiradan tushgan o'yinchilarning hissasi juda katta.
Bugun ham almashtirib tushgan futbolchilar o'yinni ancha kuchaytirishdi va aynan shuning hisobiga hisobni tenglashtirishga muvaffaq bo'ldik. Afsuski, bir futbolchimiz son orqa mushagidan jarohat oldi. Jarohat qanchalik jiddiy ekanini hozircha bilmaymiz. Shuning uchun uni majburiy almashtirishga to'g'ri keldi.
- "Buxoro" bu mavsum safar o'yinlarida ham yaxshi ochkolar to'playapti. Lekin uyda natijalar bilan taqqoslaganda, mehmonlarda ba'zi o'yinlarda ochko yo'qotilmoqda. Sizningcha, safar bahslarida jamoaga nima yetishmayapti?
- Biz o'z imkoniyatlarimizni juda yaxshi bilamiz va har bir o'yinda qo'limizdan kelganining eng yaxshisini ko'rsatishga harakat qilamiz. Chunki xatoni ham, kamchilikni ham kechirish mumkin. Lekin agar inson harakat qilmasa, buni kechirish qiyin. Jamoada hamma buni yaxshi tushunadi va har kim o'z holatidan kelib chiqib, yuz foiz kuchini berishga intiladi. Balki ayrim o'yinlarda bizga omad yetishmagandir. Hozir hammasini eslay olmayman. Masalan, "Surxon"ga qarshi haqiqatan ham yutqazgandik. Keyin OKMK bilan yaxshi o'yin bo'lgan edi. O'sha bahsda hisobni tenglashtirdik, lekin oxirida yana gol o'tkazib yubordik. Qayerdadir omad yetishmaydi, qayerdadir mahoratimiz kamlik qiladi. Aniq bir sababni aytish qiyin.
Albatta, ko'pchilik uchun "Buxoro"ning uchinchi o'rinda borayotgani kutilmagan holat. Lekin biz har bir o'yinning ahamiyatini yaxshi tushunamiz va shu o'rinni saqlab qolishga harakat qilamiz. Hozirgi moliyaviy sharoitda futbolimizda muammolar yetarli. Shuning uchun yuqori o'rinlarda bo'lish biz uchun juda muhim. Biz Buxoro viloyati va uning muxlislarini namoyon etyapmiz. Qanday bo'lmasin, yaxshi natijalarimiz odamlarga quvonch bag'ishlayotganini yaxshi bilamiz. Bu esa eng muhimi.
- Mavsum boshida "hozircha yuqori o'rinlar uchun kurash haqida gapirish erta, biz faqat har bir o'yin haqida o'ylaymiz" degan edingiz. Hozir ikkinchi davra boshlandi va jamoa uchinchi o'rinda ketmoqda. Mavsum oxirigacha sovrinli o'rinlar uchun kurashishga kuch yetadimi?
- Endi shu o'rinda ekanmiz, albatta, har bir o'yinda eng yaxshi futbolimizni ko'rsatishga harakat qilamiz. Biz uchun har bir uchrashuv xuddi oxirgisidek ahamiyatli. Biz faqat bugungi kun haqida o'ylaymiz. Hozircha kelajak haqida emas, aynan hozirgi vazifani bajarish muhim.
- Jamoaning jismoniy tayyorgarligi ham, konsentratsiyasi ham yaxshi ko'rinib turibdi. Ko'pchilik "Buxoro"ni mavsum yarmida uchinchi o'rinda ko'rishini kutmagandi. Endi bosim paydo bo'lmaydimi? Medallar uchun kurashish haqidagi o'ylari jamoani ruhiy jihatdan siqib qo'ymaydimi?
- Yo'q, bunday bo'ladi deb o'ylamayman. Albatta, uchinchi o'rinda turish yoqimli. Lekin biz aynan shu o'ringa yopishib olganimiz yo'q. Biz har bir o'yinda shu paytda tayyor bo'lgan futbolimizni ko'rsatishga harakat qilamiz. "Qanday bo'lmasin uchinchi o'rinni saqlab qolishimiz shart", degan fikr yo'q. Albatta, mavsumni uchinchi o'rinda yakunlasak, juda yaxshi bo'lardi. Lekin hozirdanoq "biz bronza medallari uchun kurashamiz", deb aytish to'g'ri emas. Bu aksincha jamoani ruhiy bosimga solishi mumkin. Shuning uchun faqat bugungi kun bilan yashaymiz. Bugun o'yin o'tkazdik, poytaxtdan ochko oldik, endi ikki kunlik dam olamiz. Rostdan ham, ikki kunlik dam olishga ehtiyoj bor.
Murabbiy sifatida jamoani kuchaytirishni, uchinchi o'rin uchun kurashda raqobatbardosh bo'lishni istardim. Buning uchun tarkibni kuchaytirish kerak. Lekin hozircha imkoniyatimiz shuncha. Shuning uchun bor imkoniyatimiz bilan ishlayapmiz.
- Demak, har bir o'yindan keyin futbolchilarga: "O'tgan g'alabalarni unutinglar. "Paxtakor" bilan bo'lgan o'yin ham tarix. Endi navbatdagi bahs haqida o'ylaymiz", deb aytasizlarmi?
- Ha, aynan shunday. Har safar o'zingizni qaytadan isbotlashingiz kerak. O'tgan yutuqlar hech qanday ahamiyatga ega emas. Har qanday raqibga qarshi o'ynash mumkin. Eng muhimi — o'zingizga ishonish, o'z imkoniyatingizni ko'rsatish istagi va maydonda bor kuchingizni berish. Biz aynan shu tamoyilga amal qilamiz», - deya bosh murabbiyning so'zlarini keltiradi Tribuna.uz muxbiri.
