Қизиқарли ўтган «Пахтакор» ва «Бухоро» (2:2) ўртасидаги учрашувдан кейин меҳмонлар бош мураббийи Александр Хомяков матбуот анжуманида саволларга жавоб қайтарди.
- Аввало ўйин ҳақидаги таассуротларингиз. Изоҳ берсангиз.
- Албатта, жуда хурсандман. Энг аввало, йигитлар нима учун майдонга тушганини яхши англаётганидан мамнунман. Ростини айтсам, танаффусдан кейин ҳисоб 0:2 бўлиб турганида, бу ўйинни қутқаришимизга унчалик ишонмаган эдим. Лекин мен доим айтиб келганимдек, йигитлар онгли, масъулиятли. Улар характер кўрсатишди, курашишдан тўхтамади ва натижада ҳисобни тенглаштириб, пойтахтдан бир очко билан қайтишга эришдик. Бунинг учун уларга катта раҳмат.
- Энди олдинда «Бухоро» учун навбатдаги ўйин турибди. Бугун «Пахтакор»ни деярли 70 дақиқа ҳимояланишга мажбур қилдингиз. Демак, уларга қарши маълум бир ёндашувни топгансиз. Ҳозир камтарлик қилиб, «йигитлар ўзларига ишонди» деяпсиз. Лекин жамоангиз ўйинига қарасак, тараққиёт босқичма-босқич кўриниб турибди.
- Албатта, бизда муайян режа бор эди ва шу режани амалга оширишга ҳаракат қилдик. Афсуски, гол ўтказиб юбордик. Табиийки, ҳисобда ортда қолиб кетсак, қандай ҳаракат қилишимиз ҳақида ҳам режамиз бор эди. Бу ҳолатда таваккал қилишга тўғри келарди. Лекин тайёргарлигимиз ва тактикамизнинг барча жиҳатларини очиб бермайман. Энг муҳими, биринчи бўлимдан кейин шошилиб кетмаслик, танаффусдан кейин ҳам ўз режамиздан оғишмаслик ва ўйин охирида босимни кучайтириш эди. Айнан шуни кўзлаган эдик.
Биз рақибнинг тўпни яхши назорат қилишини, уни олдинга олиб чиқишини ва кучли прессинг қила олишини яхши билардик. Бундай зич тақвимда бундай жамоага қарши бутун ўйин давомида прессинг қилиш жуда қийин. Шунинг учун прессингни фақат керакли пайтларда қўллашни режалаштирган эдик.
Энг муҳими, йигитлар ҳисобни дарҳол тенглаштириш учун шошилмади. Акс ҳолда бу оғир оқибатларга олиб келиши мумкин эди. Улар интизомли равишда режага амал қилди ва ўйин сўнггида рақибни босим остига олиб, ҳисобни тенглаштира олдик.
- Энди кейинги учрашувга қарши ўйинга тайёргарлик қандай кечади?
- Ҳеч қандай ўзгариш йўқ, одатдагидек тайёргарлик кўрамиз. Захирадаги ҳам, асосий таркибдаги ҳам барча футболчилар ўз вазифасини яхши тушунади. Мен ҳар доим йиғин олдидан ҳам айтаман: ўйинни бир ўн бирлик бошлайди, лекин уни бошқа футболчилар якунлайди. Замонавий футболда захирадан тушган ўйинчиларнинг ҳиссаси жуда катта.
Бугун ҳам алмаштириб тушган футболчилар ўйинни анча кучайтиришди ва айнан шунинг ҳисобига ҳисобни тенглаштиришга муваффақ бўлдик. Афсуски, бир футболчимиз сон орқа мушагидан жароҳат олди. Жароҳат қанчалик жиддий эканини ҳозирча билмаймиз. Шунинг учун уни мажбурий алмаштиришга тўғри келди.
- «Бухоро» бу мавсум сафар ўйинларида ҳам яхши очколар тўплаяпти. Лекин уйдаги натижалар билан таққослаганда, меҳмонда баъзи ўйинларда очко йўқотилмоқда. Сизнингча, сафар баҳсларида жамоага нима етишмаяпти?
- Биз ўз имкониятларимизни жуда яхши биламиз ва ҳар бир ўйинда қўлимиздан келганининг энг яхшисини кўрсатишга ҳаракат қиламиз. Чунки хатони ҳам, камчиликни ҳам кечириш мумкин. Лекин агар инсон ҳаракат қилмаса, буни кечириш қийин. Жамоада ҳамма буни яхши тушунади ва ҳар ким ўз ҳолатидан келиб чиқиб, юз фоиз кучини беришга интилади. Балки айрим ўйинларда бизга омад етишмагандир. Ҳозир ҳаммасини эслай олмайман. Масалан, «Сурхон»га қарши ҳақиқатан ҳам ютқазгандик. Кейин ОКМК билан яхши ўйин бўлган эди. Ўша баҳсда ҳисобни тенглаштирдик, лекин охирида яна гол ўтказиб юбордик. Қаердадир омад етишмайди, қаердадир маҳоратишмиз камлик қилади. Аниқ бир сабабни айтиш қийин.
Албатта, кўпчилик учун «Бухоро»нинг учинчи ўринда бораётгани кутилмаган ҳолат. Лекин биз ҳар бир ўйиннинг аҳамиятини яхши тушунамиз ва шу ўринни сақлаб қолишга ҳаракат қиламиз. Ҳозирги молиявий шароитда футболимизда муаммолар етарли. Шунинг учун юқори ўринларда бўлиш биз учун жуда муҳим. Биз Бухоро вилояти ва унинг мухлисларини намоён этяпмиз. Қандай бўлмасин, яхши натижаларимиз одамларга қувонч бағишлаётганини яхши биламиз. Бу эса энг муҳими.
- Мавсум бошида «ҳозирча юқори ўринлар учун кураш ҳақида гапириш эрта, биз фақат ҳар бир ўйин ҳақида ўйлаймиз» деган эдингиз. Ҳозир иккинчи давра бошланди ва жамоа учинчи ўринда кетмоқда. Мавсум охиригача совринли ўринлар учун курашишга куч етадими?
- Энди шу ўринда эканмиз, албатта, ҳар бир ўйинда энг яхши футболимизни кўрсатишга ҳаракат қиламиз. Биз учун ҳар бир учрашув худди охиргисидек аҳамиятли. Биз фақат бугунги кун ҳақида ўйлаймиз. Ҳозирча келажак ҳақида эмас, айнан ҳозирги вазифани бажариш муҳим.
- Жамоанинг жисмоний тайёргарлиги ҳам, концентрацияси ҳам яхши кўриниб турибди. Кўпчилик «Бухоро»ни мавсум ярмида учинчи ўринда кўришини кутмаганди. Энди босим пайдо бўлмайдими? Медаллар учун курашиш ҳақидаги ўйлар жамоани руҳий жиҳатдан сиқиб қўймайдими?
- Йўқ, бундай бўлади деб ўйламайман. Албатта, учинчи ўринда туриш ёқимли. Лекин биз айнан шу ўринга ёпишиб олганимиз йўқ. Биз ҳар бир ўйинда шу пайтда тайёр бўлган футболимизни кўрсатишга ҳаракат қиламиз. «Қандай бўлмасин учинчи ўринни сақлаб қолишимиз шарт», деган фикр йўқ. Албатта, мавсумни учинчи ўринда якунласак, жуда яхши бўларди. Лекин ҳозирданоқ «биз бронза медаллари учун курашамиз», деб айтиш тўғри эмас. Бу аксинча жамоани руҳий босимга солиши мумкин. Шунинг учун фақат бугунги кун билан яшаймиз. Бугун ўйин ўтказдик, пойтахтдан очко олдик, энди икки кунлик дам оламиз. Ростдан ҳам, икки кунлик дам олишга эҳтиёж бор.
Мураббий сифатида жамоани кучайтиришни, учинчи ўрин учун курашда рақобатбардош бўлишни истардим. Бунинг учун таркибни кучайтириш керак. Лекин ҳозирча имкониятимиз шунча. Шунинг учун бор имкониятимиз билан ишлаяпмиз.
- Демак, ҳар бир ўйиндан кейин футболчиларга: «Ўтган ғалабаларни унутинглар. «Пахтакор» билан бўлган ўйин ҳам тарих. Энди навбатдаги баҳс ҳақида ўйлаймиз», деб айтасизларми?
- Ҳа, айнан шундай. Ҳар сафар ўзингизни қайтадан исботлашингиз керак. Ўтган ютуқлар ҳеч қандай аҳамиятга эга эмас. Ҳар қандай рақибга қарши ўйнаш мумкин. Энг муҳими — ўзингизга ишониш, ўз имкониятингизни кўрсатиш истаги ва майдонда бор кучингизни бериш. Биз айнан шу тамойилга амал қиламиз», - дея бош мураббийнинг сўзларини келтиради Tribuna.uz мухбири.
